Naar inhoud springen

Gevechte oppe grens tösje Armenië en Azerbeidzjan

Van Wikinuujs

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich

Plaetje mit alle plaatse woe 't gevechte goof
Dit artikel is gesjreve in 't AGL.

Bie gevechte oppe grens tösje Armenië en Azerbeidzjan zint mie es 200 doeje gevalle. Volges Azerbeidzjan höbbe Armeense troepe landjmiene geplaats op Azerbeidzjaans gróndjgebeed, dewiel Armenië bewaert det Azerbeidzjaanse troepe op versjillende plaatse illegaal de grens zint euvergesjtaoke en dörper ónger vuur höbbe genome. Det bliek oet videobeelde van 't Armeens ministerie van Defensie en satellietbeelde vanne NASA. De Azerbeidzjaanse bewaeringe zint lestig te verifiëre en det maak 't dinkelik det Azerbeidzjan Armenië doelbewös haet aangevalle. De aanvalle waore groetsjalig en de regering in Bakoe haet bevestig det 't e aantal bergtoppe haet veroverd. Die sjtrategie zuut me ouch truuk in anger incidente, bieveurbeeld ierder dit jaor in Hoeg-Karabach. Bergtoppe höbbe sjtrategische waerde.

Door 't geweld zint teentalle hoezer in Armeense dörpkes en sjtaej kórtbie de grens kepotgesjote en doezende luuj gevlöch.

Oppe grens is 't de lètste jaore dökker ónröstig gewaes. Nao de val vanne Sovjet-Unie en de ónaafhenkelikheid van bei lenj in 1991 veroverde Armeense separatiste de etnische enclave Hoeg-Karabach en sjtökke landj dao-ómhaer. Groete deile van 't separatistische gebeed woorte inne herfs van 2020 heroverd door de Azerbeidzjaanse sjtriedkrachte. Óngevier 2000 Róssische vraejestroepe bewake saer 't lètste sjtaat-'t-vure de deile van Hoeg-Karabach die de Azerbeidzjaanse troepe neet kóste verovere. Dao woene etnische Armene en höbbe de separatiste 't nog ömmer veur 't zègke, wiewaal de toekómstige sjtatus van 't gebeed óndudelik blief. Regelmaotig guf 't hie incidente woebie meistal Azerbeidzjaanse troepe Armeense dörper en militair posities besjete. Saer 't akkoord guf 't aevel ouch sjteeds dökker incidente oppe grens tösje Armenië en Azerbeidzjan, twie lenj die internationaal waere erkènd. De grenze verloupe zier grillig en sjtamme nog oet d'n tied wie bei lenj bieje Sovjet-Unie huurde. Hie en dao is 't ouch neet gans dudelik wie de grenze percies verloupe.

Analyste zeen boetedet e verbandj tösje de kreeg inne Oekraïne en d'n Azerbeidzjaanse verrassingsaanval. 't Guf vermeujes det Róslandj saer 't begin vanne invasie in fibberwarie vraejestroepe haet ingezat aan 't front inne Oekraïne, woedoor de Róssische posities en die van Armeense milities zjwaker zint gewaore. Wiejer guf 't kritiek op 'ne recent gesjlaote gaasdeal tösje de EU en Azerbeidzjan, wat ouch de óngerhanjelingspositie van Europese lenj zjwaker maak. Azerbeidzjan zou misbroek make van die situatie, wat zich oet in 't geregeld sjende van 't sjtaak-'t-vure oppe grens mitte enclave en 't internationaal erkènd gróndjgebeed van Armenië. Ouch guf 't inne internationaal gemeinsjap groete zörg euver e aantal ómsjtreje oetsjpraoke vannen Azerbeidzjaanse prizzedent Aliyev. Zoe numde hae de zujelike provincies van Armenië "historisch Azerbeidzjaans gebeed" en zag e det Azerbeidzjane daonao truuk zölle kiere. Armene zint daodoor bang det 't äöpene van 'ne corridor tösje Azerbeidzjan enne enclave Nachitsjevan tot nuuj incidente,'ne nuje krieg of etnische zuveringe zal leije.

Op 14 september höbbe bei lenj e akkoord gesjlaote euver e sjtaak-'t-vure.

Kiek ouch

[bewirk | brón bewèrke]

Brónne

[bewirk | brón bewèrke]


Dit artikel besleit aad nuujs en maak deil oet van oos arsjief van nuujsberichte.

Aafkómstig van "https://li.wikinews.org/w/index.php?title=Gevechte_oppe_grens_tösje_Armenië_en_Azerbeidzjan&oldid=22285"