Ouch in anger plaatse inne ómgaeving van Kiev börgers doedgemaak door Róssische troepe, 400 luuj vermis in Hostomel

Dit artikel is gesjreve in 't AGL.

Op de begraafplaats van 't dörp Stary Bykiv, get ten oeste vanne huidsjtad Kiev, woorte zès lichame opgegrave van luuj die op 27 fibberwarie woorte opgepak en vermaord. Ouggetuge besjrieve det de lichame dao daag op de sjtraot loge en det ómwoenende van de Róssische troepe gein toesjtömming hadde gekrege veur de sjlachoffers te begrave.

Nieuwsuur-versjlaaggaever Gert-Jan Dennenkamp vergeliek de mäörd mit die in Boetsja, woe aafgeloupe zóndig zeker 300 lieke op de sjtraot en in massagraver woorte gevónje. Sommige luuj waore dinkelik e willekeurig doelwit en woorte bieveurbeeld doedgesjaote wie ze op de sjtraot fietsde, mer bie väöl luuj waore de henj oppe rögk gebónje. Róslandj óntkènt get te make te höbbe mit die maordpartieje, mer volges Kiev en de internasjonaal gemeinsjap geit 't hie óm zjwaor kriegsmisdade.

't Gif daodoor zörg det dit op mierder plaatse in de Oekraïne is gebeurd die in henj waore vanne Rósse. Op 't moment waere bieveurbeeld ouch 400 luuj oet Hostomel vermis, 'n sjtad die kórtbie Kiev en Boetsja ligk. Wat me waal zeker wèt, is det dao begin miert d'n börgemeister woort vermaord. E vergeliekbaar berich kump oet 't dörpke Motizjin, woe de börgemeisterin mit häör ganse familie woort gemarteld en doedgesjaote door Róssische troepe.

Kiek ouch[bewirk | brón bewèrke]

Brónne[bewirk | brón bewèrke]