Oekraïens taegenoffensief in Cherson begós
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
- Dit artikel is gesjreve in 't AGL.
De Oekraïense armee haet bevestig det ze e groetsjalig taegenoffensief is begós in d'n oblas Cherson, dae veur e groet deil bezat is door Róslandj. De Oekraïne zaet det ze daobie e Róssisch waopedepot haet geraak en zeker 52 soldaote haet doedgemaak. De Rósse sjpraeke dit taege en zègke det ónger anger e krankehoes woort getroffe en det daobie 7 luuj óm 't laeve zin gekómme en teentalle gewónje zin gevalle.
't Ierste doelwit van 't offensief is Nova Kachova, 'n strategisch gelaege sjtad aan d'n Dnjepr, get ten oeste van 't besjtuurlik centrum Cherson. Aan 't begin vanne invasie woort dit gebeed rilletief sjnel ingenómme door Róssische troepe, die de regio vanoet de Krim aanvele. 't Gif aanwiezinge det de Rósse de regio wille "róssificere". In dees contreie gebroek me bieveurbeeld al de Róssische roebel en neet de Oekraïense grivna en wiejer is allein nog mer Róssische media besjikbaar.
Bieje mónjing vannen Dnjepr hauverwaeges Cherson enne havesjtad Mykolaiv kóste de Oekraïense troepe de Rósse taegehaje, woenao 't front maondelank min of mie sjtabiel bleef en de Oekraieners soms zelfs in 't veurdeil waore. Ze höbbe in daen tied al get dörpkes en tactische posities weite te herovere, dewiel de Róssische troepe zich mie en mie ginge concentrere op d'n Donbass.
't Taegenoffensief in 't zuje sjtóng al langer oppe agenda, mer is dinkelik e realistischer doel gewaore door de lievering van e geavanceerd Amerikaans raketsysteem (M142-HIMARS) en 't feit det de Rósse in dees contreie dudelik in 't defensief zint geraak door de campagne in 't oeste. De Oekraïense regering haet börgers opgerope 't front te verlaote, dewiel de Róssische armee häör posities inne regio al probeert te versjterke.
Kiek ouch[bewirk | brón bewèrke]
- Róslandj book veuroetgank in d'n Donbass, mie hölp veur de Oekraïne
- Róssische armee vèlt de Oekraïne binne
Brónne[bewirk | brón bewèrke]
- LIVE | Oekraïne: tegenoffensief begonnen in bezette Cherson: ‘Ziekenhuis getroffen’. De Limburger - 12 juli 2022
- Russian Offensive Campaign Assessment, July 12. Kateryna Stepanenko, Grace Mappes, George Barros, Layne Philipson & Frederick W. Kagan, Institute for the Study of War - 12 juli 2022
- Oekraïens tegenoffensief in Cherson begonnen: wapendepot volgens Oekraïne, burgerdoelwitten, zegt Rusland. Valerie Vanhelden, NWS - 12 juli 2022
- Ukraine has one million ready for fightback to recapture south. Maxim Tucker, The Times - 10 juli 2022
Dit artikel besleit aad nuujs en maak deil oet van oos arsjief van nuujsberichte.