Mie es hónderd luuj doedgebleve bie aansjlaeg vleegveldj Kaboel

Evacuatie van Afghaanse börgers op 't vleegveldj van Kaboel (18 augustus 2021)

Dit artikel sjteit gesjreve in 't AGL.

27 augustus 2021 - Bie twie bomaansjlaeg op 't internationaal vleegveldj vanne Afghaanse huidsjtad Kaboel zeen mie zieëker 170 luuj doedgebleve en 200 gewónje gevalle. Ónger de doeje waore 95 Afghaanse börgers, 28 Taliban-militante en 13 Amerikaanse soldate. Ouch zeen 18 Amerikaanse militaire gewóndj geraak.

Volges Amerikaanse functionarisse zit de lokaal aafdeiling van terreurbewaeging ISIS achter de aansjlaeg. Dae terroristische groep is veural actief in 't oeste van 't landj en sjteit op gesjpanne voot mit de Taliban, die nog gein twie waeke geleje mit de val van Kaboel bauw gans Afghanistan höbbe veroverd en de pro-westerse regering van presidentj Ghani ten val höbbe gebrach.

Ten tieje vanne aansjlaeg waore doezende luuj aanwaezig op 't vleegveldj, innen haop det ze geëvacueerd kóste weure. De situatie waor chaotisch en me geit dan ouch vanoet det 't doejetal nog wiejer zal oploupe. 't Pentagon waor al oppe huuegde vanne dreiging. Daoróm sjtopde ónger anger Nederlandj mit 't evacuere van luuj.

De VS zeen nog waal van plan óm börgers te evacuere. Op dit moment controlere Amerikaanse militaire nog 't vleegveldj en per 1 september zölle de lèste vertrèkke.

Internationaal woort gesjók gereageerd op de aansjlaeg. D'n Amerikaanse presidentj Joe Biden haet de aansjlaeg in 'n tillevisietoesjpraok veroerdeild: " V'r vergaete en vergaeve nieks. V'r zölle uch vinje en uch dit betaald zette." De taliban höbbe de aansjlaeg veroerdeild via 'nen tweet.

Kiek ouch

• NAVO trèk nao 20 jaor alle troepe truuk oet Afghanistan
• Taliban gaon boetewieke Kaboel binne, groete sjtad Jalalabad veroverd

Brónne

• Islamitische Staat in Afghanistan: zeer gevreesd, en zeker geen vriend van de Taliban. Sacha Kester, De Volkskrant, 26 augustus 2021
• The latest on the Kabul airport attack. CNN.com - 27 augustus 2021
• Nederland stopt vandaag met evacuaties vanuit Afghanistan: militairen en ambassadepersoneel weg. RTL Nieuws - 26 augustus 2021
• ‘We Will Not Forgive,’ Biden Says, Vowing Retaliation for Kabul Attack. The New York Times - 26 augustus 2021, lètsen update: 27 augustus, 7:55 oer
• World leaders and Taliban condemn attack near Kabul airport. Claire Parker - The Washington Post, 27 augustus 2021