NAVO trèk nao 20 jaor alle troepe truuk oet Afghanistan

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Afghaanse commando's tiedes 'n infiltratie-oefening
Dit artikel sjteit gesjreve in 't AGL.

De NAVO trèk nao twintig jaor alle troepe truuk oet Afghanistan, woerónger 160 Nederlandse militaire. 't Bondjgenootsjap volg daomit 't initiatief vanne VS, det de aafgeloupe dinsdig al aankóndigde de eige troepe definitief truuk te trèkke.

De Nederlandse militaire in Afghanistan zeen óngerdeil vanne NAVO-missie Resolute Support. Saer 2015 höbbe zie de taak veur de armee, de pelissie en 't veiligheidsapparaat wiejer op te bouwe. De missie sjtónd gepland bis 't indj van 2021.

De NAVO wilt alle troepe van Resolute Support binnen e paar maonde truukhaole en deit det in naovolging vanne Amerikane. "De truuktrèkking geit op ordentlike, gecoördineerde en veurtvarende wies gebeure," aldusse NAVO.

Volges NAVO-sikkertaris-ginneraal Jens Stoltenberg is 't noe ane Afghane óm de blievende vraej te bewèrksjtellige in häör landj.

Daoveur is e serieus en volledig vraejsverdraag nudig "det 'n indj maak aan geweldj, de minserechte besjermt van alle Afghane en in 't biezónger vrouwluuj, kinger, minderhede, det de rechssjtaat euverindj hèlt en det d'rveur zörg det Afghanistan noets mie zal dene es 'n veilige have veur terroriste".

Demissionair minister Stef Blok (Boetelandse Zake) zag goonsdig det Afghanistan ouch nao de truuktrèkking vanne troepe óngersjteuning mót kriege, zoedet de behaolde veiligheidswins vanne lètste decennia neet verlore geit.

Volges Blok is Afghanistan nao twintig jaor geine oetvalsbasis mie veur internationaal terrorisme en mótte lenj dao aandach veur haje.

De NAVO volg bieje truuktrèkking 'tzelfde tiedsjema es de VS. De operatie begint oppen ierste mei en zal veuren èlfde september vaerdig zeen, d'n daag det percies twintig jaor truuk terroriste van Al-Qaeda mit vleegmesjiens aansjlaeg pleegde inne Vereinigde Sjtaote.

De aansjlaeg vörmde de opmaot veur wat de langste kreeg inne gesjiedenis vanne Vereinigde Sjtaote zou weure.

Achtergróndj[bewirk | brón bewèrke]

RSM is 'n óngersjteunende missie enne wichtigste take vanne deilnummende lenj zeen 't gaeve van training, advies en assistentie ane Afghaanse pelissie en armee. De missie weurt geleid door 't Allied Joint Force Command Brunssum (HQ JFCB).

Brónne[bewirk | brón bewèrke]



Dit artikel besleit nuujs det zich recèntjelik haet aafgespeeldj.