Gein óngerzeuk nao kreegsverleje Baek, joedse gemeinsjap gesjok

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich

Dit artikel sjteit gesjreve in 't AGl.

Wèthajer Ralf Diederen vanne gemeinte Baek geit gein óngerzeuk insjtelle nao 't foute kreegsverleje van zien gemeinte. In taegesjtelling toet Remunj, Mesjtreech en Venlo die waal de rol vanne gemeinte bie de rouf van joeds vasgood óngerzeuke. Oet ierder óngerzeuk nao "Verkaufsbücher" in 't kadaster en 't Nasjonaal Arsjief in 2020 bleek det makelaers, notarisse en kuipers good geld verdeend höbbe van hoezer en objekte die van Joede woorte aafgenómme.

Ernst De Reus, veurzitter vanne Joedse gemeinsjap in Limbörg zaet "verbaas en gesjok" te zien det de gemeinte haet besjlaote gein óngerzeuk nao 't kreegsverleje te doon. "'t Sjteit vas det de gemeinte Baek hoezer van Joedse inwoeners haet gekoch en daoróm is 't noedzakelik veur te kieke nao wat in 't verleje haet plaatsgevónje. Ich vinj 't hiel sjpietig det de gemeinte dit neet deit."

Tiedes d'n Twiede Weltkreeg, wie joede vervolg en meistal ouch vermaord woorte, woorte hoezer van gevlöchde of opgepakde Joede dök veur minder es de mertwaerde verkoch en wer doorverkoch. Veur zoewied bekindj is Baek de einige gemeinte die zelf Joedse woenobjekte aansjafde. Vassjteit bieveurbeeld det NSB-börgemeister Paul Schmalbach in daen tied e ajer Joeds echpaar dwong veur hön woening aan 'm aaf te sjtaon. Officieel dokumente tuine aan det Baek drie woeninge of percele koch van Joedse inwoeners.

Ouch wen me det bie de gemeinte wèt, haet de wèthajer gein intensie óm dit te óngerzeuke.

Brónne

Dit artikel besleit aad nuujs en maak deil oet van oos arsjief van nuujsberichte.