Zjuustiesje wiltj verbód op moeaterkliek Satudarah

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


MOFERT - 8 mei 2018 - Moeaterkliek Satudarah en zien stäönklieks mótte waeren óntbónjen en verbaoje.

Det betoug 't Aopenbaar Ministerie dinsdig inne rechbank. Aldus 't OM hanjeltj de moeaterkliek in stried mitte aopenbaar orde en haet de kliek 'n "subkultuur óntwikkeldj die geweldj verhieërlik".

d'n Offeceer van zjuustiesje gaaf 'n opsomming van straofbaar feite die de aafgeloupe twieë jaor zówwe zeen geplieëg door leje van Satudarah. "Mótte veer den ech geluive det 't hie ederskieër geit euver rotte appele?" aldussen offeceer. Geweldjplieëging zów zelfs staotverhuuegendj wirke binne de kliek, betougdje d'r. Slechoffers en getuge zwiegen aldus dem oet sjrump.

Satudarah haet in oos pervinsje veer kapitele: in Gelaen, Mestreech, Haerlen en 't kapitel "South Clan" in Midde-Limbörg. De aafdeiling van Gelaen laag d'n aafgeloupen tied ónger e vergruuetglaas door e groeat óngerzeuk vanne pliessen en zjuustiesje nao krimineel aktiviteite vanne kliek.

In 'n saortgelieke civiel proceduur ane inj 't veurig jaor taenge Bandidos gaaf de richter 't OM geliek: de moeaterkliek woort mit det verbaoje. 't Verbód guldj in Nederlandj veur zowaal de nasjenaal es de internasjenaal aafdeiling. Bandidos góng daorop in hoger beroop. Ómdet dae zaak nag luip, guldj 't verbód nanneet.

Satudarah woort ieëre verbaojen in Duutsjlandj. 't Is 'ne oearsprunkelik Molukse moeaterkliek dae inne aafgeloupe jaore sterk is gegreudj. De kliek haet zoeaget hóngerd kapitelen in binnen- en boetelandj. In Nederlandj tèltj de kliek zoeaget neugenhóngerd leje.

Veure civiel proceduur inne rechbank in Amsterdam zeen twieë daag oetgetróch. Kómmendjen dinsdig inne middig kómme de advekaote vanne moeaterkliek aan 't waord.



Dit artikel besleit aad nuujs.