Zes nuuj coronopatiënte in Limburg

Van Wikinuujs

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Dit artikel sjteit gesjreve in 't AGL

't Aantal Limburgers det besjmet is mit 't coronavirus is wiejer opgeloupe nao zeve. Dónderdig zien zes nuuj gevalle bevestig gewaore, zoe meldt de GGD Zuud-Limburg. Eine van de patiënte ligk in karretaen in 't Zuyderlandkrankehoes. De anger zit in thoesisolatie. Goonsdigmiddig maakde de GGD d'n ierste Limburgse coronakranke bekindj. 't Geit óm 'ne 55-jäörige manskaerel oet Gelaen. Daobie woort gezag det ouch zien vrouw griepechtige klachte haet. 'nen Test dae dónderdigmiddig bekindj woort, bevestig det ouch zie 't virus haet.

Bie de euverige vief nuuj patiënte geit 't óm 'n echpaar oet Zumpelveld, 48 en 44 jaore aad, en 'n 44-jäörige vrouw oet Mesjtreech. Net wie 't echpaar oet Gelaen zien zie waarsjienlik besjmet geraak op vekansie in Naord-Italië. Van de twie euverige nuuj patiënte, 'n 52-jäörige vrouw oet Zitterd-Gelaen en 'ne 74-jäörige manskaerel oet Baekdaele, is nog neet bekindj woe zie precies häör corona-besjmetting höbbe opgeloupe.

D'n 74-jäörige manskaerel weurt opgenaome in 't Zuyderlandkrankehoes, zoe meldt krankehoesbesjtuurder David Jongen. De patiënt ligk in isolatie. 't Geit nao ómsjtandighede good mit 'm. “De patiënt vörmp gein risico op wiejer besjmetting binnen 't krankehoes”, aldusse Jongen. “Hae ligk op 'n aparte kamer, woe hae naotoe woort gebrach conform alle veiligheidsveursjrifte. Ouch de mitwerkers neme die in ach. Waal woort 'n mitwerkster die gister ónbesjermp inne buurt waor vanne patiënt oet veurzörg nao hoes gesjik. Zie haet gein klachte.”

De GGD Zuud-Limburg is inmiddels gesjtart mit oetgebreid contakóngerzeuk óm wiejer besjmetting te veurkómme. Aan alle nuuj coronakranke woort gevraog mit waem zie d'n aafgeloupen tied contak höbbe gehad. Volges Christian Hoebe, dae verantwaordelik is veur de aafdeiling infectiekrenkdes van de GGD, kin det óngerzeuk nog waal e paar daag doere. Hae benaodrök aevel obbenuuts det 't gein reje gief veur ónrös.

Dónderdig woort ouch bekindj det 'ne mitwerker van de Universiteit Mesjtreech is besjmet mit 't coronavirus. De persoen woent euver de grens in Pruses en blief veurluipig thoes. De universiteit verwach neet det de mitwerker emes in Mesjtreech haet besjmet.

't RIVM maakde dónderdig bekindj det landelik 't aantal corona-besjmettinge mier es verdöbbeld is. Goof 't goonsdig nog 39, inmiddels is det aantal opgeloupe bis 82. Aafgezeen van 't echpaar oet Gelaen zeen de nuuj Limburgse kranker daobie noneet mitgeraekend. Luuj die zich al langer krank veulde, maar zelf neet óm 'nen tes höbbe gevraog, doon det noe esnog.

Hoe wies ouch op 't Italië-effek, want e groet deil van de nuuj besjmettingsgevalle in Limburg en in 't ganse landj kint dao zien oersjprong. De verwachting is dan ouch det 't aantal coronokranke de kómmende daag nog wiejer geit toeneme, ouch in Limburg. In Naord- en Midde-Limburg zeen veur noe nog gein bevestigde coronakranke opgedaoke.

Brónne[bewirk | brón bewèrke]



Dit artikel besleit aad nuujs en maak deil oet van oos arsjief van nuujsberichte.