Watersjap luuetj akkergrunj óngerloupe mit water

Van Wikinuujs

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


't Ónger water zètte van akker- en weilandj zal nuuedig waere veure gróndjwaterstandj te baetere wen de raengen oetblief.

MOFERT - 22 november 2018 - 't Watersjap Limbörg haet es e gevolg vanne druuegdje dore klimaatverangering beslaote de stoewen inne pervinsje oppe zomerstandj te laote staon. Det hèltj in det de stoewen ómhoeagstaon en wen 't ónverhöds geit raengere kan 't water nörges eweg.

Hieveur haet me gekaozen ómdet 't d'n aafgeloupen tied väölste min haet geraengerdj. Zoea staon tachentig percent vanne baeke druueg en is de gróndjwaterstandj te lieëg. Me haet det veur 'nen tied geleus door water oete Maas de baeken in te laote struime; gans biejein hanjeltj 't hie óm 70 miljoen kuub aan ómgepómp water, aeve väöl wie WML oete gróndj pómp veur kraanwater. Veural in Naord- en Midde-Limbörg staon de baeke väölste lieëg.

Waat me noe broek is raenge. Wen 't neet zat geit raengere zólle de stoewe gaar neet inne wintjerstandj waere gezatj en zal me akkergrunj ónger water mótte laote loupe veure gróndjwaterstandj aan te völle. Wen me det neet duit zal 't kómmendj veurjaor de situaasje hieël slech waere, zowaal veure netuur es veure landjboew. Den zólle d'n ougs enne netuur 't volgendj jaor nag las höbbe vanne druuegdje die al vanaaf de zomer aanhèltj. Det zów inhaje det me mót gaon keze wae rech krieg op water en wae neet.

Veur inne toekóms nag rendabel óm te kónne springe mitte klimaatverangering is noe beslaote gewore 25 miljoen euro euver te bringe zodet 't Watersjap Limbörg de perbleme vanne hoeasraengen in Maersjen en Oearsbik kan opvangen esouch de gevolge vanne druuegdje in 't naorden enne midde vanne pervinsje. Wen me gooj plannen indeentj kan det bedraag nag hoger oetvalle. De verwachting is aevel det me nag mindestes twieë kieër zoväöl broek veure perbleme daodwirkelik te kónne leuze. Det me noe geldj vriemaak is aevel e teike det me klimaatverangering es 'n ernstig perbleem zuutj det mót waeren aangepak.

Brónne[bewirk | brón bewèrke]



Dit artikel besleit aad nuujs en maak deil oet van oos arsjief van nuujsberichte.