Veurbereijing op kaenóngelök sjuutj te kort
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
MOFERT - 31 jannewarie 2018 - Nederlandj, Belsj en Duutsjlandj mótte zich baeter veurbereijen op e meugelik óngelök mit 'n kaentsentraal.
Naeven 't baetere van crisisplanne mótte de lenjer mieë samenube mit hölpprogrammen en mótte ze organisere det ze de maotregele die te numme zeen enne kómmunikaasje hie-euver óngerling aafstumme, stèltj d'n Óngerzeuksraod veure Veiligheid in e rapport.
De raod vindj ouch det de autoriteite mieër oug mótten höbbe veure zörg inne samelaeving euver 'n meugelike kaenramp. Aanleijing veur 't óngerzeuk wore zörg van luuj inne grensregio's euver 't aantaal aan incidente, wie haorsjäörkes inne kaentsentraals in Belsj.
d'n Óngerzeuksraod veure Veiligheid stèltj det de sjans op 'n ernstig kaenóngeval klein is, mer es zich zoea óngeval veurduit den höbbe de lenjer de crisisbehieërsjing neet good op einanger aafgestump. "d'n Óngerzeuksraod kónkludeertj det de samewirking op pepier deils is geregeldj, mer es zich daodwirkelik 'n kaenóngeval veurduit zal dees wersjienlik neet good verloupe", aldusse raod.
Bie e kaenóngeval mót de bevölking inne ómgaeving vanne kaentsentraal waere besjurmp taenge straoling, mer aldussen Óngerzeuksraod versjiltj de veurberejing van dees maotregele de landj. "Daoveur besteit 't risico det inweuners anen eine kantj vanne grens anger instruksjes kriegen es anen angere kantj vanne grens. Det kan leie toet verwarring en ónras óngere bevölking."
Ouch haet Nederlandj mit Belsj en Duutsjlandj gein aafspraoke gemaak euvere gezamelike besloetvörming bie e kaenóngeval inne grensstreek. Daonaeve wuuertj inne aafspraoke die zeen gemaak mit Belsj en Duutsjlandj euvere crisiskómmunikaasje te min raekening gehaje mitte versjillen in spraok en cultuur.