Twieë treins bie Vinlo gestrandj door sabotaasj
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
MOFERT - 13 jannewarie 2021 - In Vinlo en ómgaeving zeen twieë treins stil kómme te staon door kwaod miensjelik hanjele. Dinsdigtenaovendj waas 't spaor blokkeerd tösse Vinlo en Pruses door 'ne saboteerdje geujertrein, dewiel goonsdigtemorge gei treinsverkieër tösse Tegelen enne Ruiver meugelik waas door e veurwerp op 't spaor.
De kepotte geujertrein dae 't spaor dinsdigtenaovendj veur 'n aantal oer blokkeerdje kwaam aldusse masjenis door sabotaasj. d'n Trein veel róndj 17:15 stil bie d'n euvergank Veerpaerdjes in Vinlo. Dao waas d'n trein vanoet Duusseldörp nao Nederlandj óngerwaeges. De spaorwaegbeamdje verzóchte doe 'nen twieëdje lokemetief aan te koppele, mer ouch det baatdje nieks veuren trein op gang te kriege. Wie zie daorop de gansen trein betrachdje huuerdje zie bie d'n euvergank ane Bäövelste Meulen 'ne roesendje klank. Dao bleek op twieë plaatse de kranen aopgezatj, wodoor de lóchpómp neet wirkdje en lóch óntrón oete leijinge. Hiedoor bremsdje de rem kóntinu. Me wós dit perbleem te verhelpe dore krane trögk inne goje standj te zitte.
d'n Trein vanoet Pruses kós tösse 19:00 en 19:30 oer wiejer doorvare Vinlo in. 't Treinsverkieër nao Pruses det tösse Kaldekirken en Vinlo vas stóng kós weer opgezatj waere.
Goonsdigtemorge begós de spaorieëlenj aevel oppernuuj wie 'nen trein in Tegelen in aanvaring koom mit 'ne fietsj dae op 't spaor gelag woor. Hiedoor kóste gèn treins mieë vare tösse Tegelen enne Ruiver. Dae fietsj waas gestaole van 'ne krantjejóng. Dem waas t'r beruif oppe Parallelwaeg wo d'r boete gereid stóng veur zien gezètte róndj te bringe wie d'r aangespraoke woort door twieë ónbekindje manskaerele. Dees vrogen 'm aeteswaar, sigretten en geldj. Wie de jóng die det neet goof woort ziene fietsj aafgenómmen en smete de deve dem 't spaor op.
E signalement van twieë men op Börgernèt waas van men van róndj de twintjig jaor aad. Róndj 7:30 kóste dees aangehaje waere. 't Is nag neet bekindj of dit signalement verbandj hèltj mitte gebeurtenisse róndj 't spaor.
Brónne
[bewirk | brón bewèrke]- Dieven gooien fiets op spoor: treinverkeer ligt stil. Chantalle Donné - 1limburg, 11 jannewarie 2021
- Sabotage legt Duitse goederentrein stil bij Venlo. Sandra Horrichs - 1limburg, 12 jannewarie 2021
Dit artikel besleit aad nuujs en maak deil oet van oos arsjief van nuujsberichte.