Tamieltiegers behieëre 21 Nederlandjse sjoeale

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


dinsdig, oktober 4, 2011


MOFERT - Frontorganisaties van de Tamieltiegers - de aafsjeijingsbewaeging op Sri Lanka die op de Europese terreurlies steit - sture in Nederlandj zeker 21 sjoeale aan. Kinjer kriege dao aan 't ènj van de waek les in Tamielspraok, -dans en -tonieël. Det bliek oet 'n rapportage van de Nationaal Recherche, die ieëder dit jaor aan de Vereiniging Nederlandjse Gemeindje is gesjik. De sjoeale staon ónger mieër in Amsterdam, Rotterdam, Den Haag, Breda, Eintoeave, Arnheim en Lieëvarde. Volges polies en justitie wuuertj op de sjoeale lesmatterjaal gebroek worin de hèldjhachtigheid van de Tamiels, 'n bevólkingsgroep in ónger mieë Sri Lanka, wuuertj gepreze. Ouch wuuertj de gewaopendje stried van de Tamieltiegers besjreve en wuuertj oetgelag wie humaan de Tamiels wore en zeen op 't slaagvèldj. Ouch in anger lenjer zów dergeliek óngerrich verzorg waere. Euveriges zeen 's ouch Tamielprivésjoeale die neet aan de Tamieltiegers zeen gerelateerdj.

De rèchbank in Den Haag behanjeltj momentieël de straofzaak taenge vief men die d'rvan waere verdach det ze gèldj inzameldje veur de Tamieltiegers in Sri Lanka. Justitie eisdje vörge waek toet 16 jaor cel taenge häör, ónger mieër ómdet ze lid zeen van en leijing gegaeve höbbe aan 'n criminieël, terroristische organisatie. De Europese Unie plaatsdje de Tamieltiegers, vóloet de Liberation Tigers of Tamil Eelam (LTTE), in 2006 op de terreurlies. In 2009 ènjigdje officieël de stried mit de vereuvering door 't heir van 't lèste bólwirk van de Tiegers. Victor Koppe, advekaot van eine van de verdachdje, vindj de tiegers juus vrieheidsstriejers.

De waorsjoewing van de Nationaal Recherche aan de gemeindje waas bedoeldj óm bewöswaering te bewirkstèllige. In 't rapport steit ónger mieë det de (jóng) kinjer teikeninge kriege mit daoróp aafbeildjinge euver de stried. De polies neump vleegtuge die e bombardementj oetveure, sjeper die zinke, neergesjaote luuj, doeaj miense die in 'ne vrachwage ligke en hoezer die in brandj staon. De LTTE zów in ós landj de zèlfdje propaganda höbbe verspreidj es op Sri Lanka, zoea stèldje 't OM vörge waek tiedes de rèchszaak. Jóngere wuuertj vertèldj det häöre toekóms neet in Nederlandj mer op 't ijlandj ligk. De officeer van justitie sprook van 'n ónthutsendj beildj.

Brónne[bewirk | brón bewèrke]