Spits in aantaal aan netuurbrenj: netuur blief kórkedruueg

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


MOFERT - 27 julie 2018 - Dees maondj is 'n explosief toenaam te zeen van 't aantaal aan netuurbrenj. Ouch in Limbörg trèk de brandjwaer bao daacheliks oet veur bós-, hei- of anger netuurbrenj.

Dore hoeag temperaturen enne bepirkdje raengerval is de netuur kórkedruueg. Daodoor zeen klein en groeate boetebrenj op dit memènte daachelikse kos.

De brandjwaer is waakzaam, reageertj snel op meljingen en sjakeltj drek mieëdere blöswages in veur te verkómme det groeate stökker aan netuur door brandj waere verinneweerdj. Det bliek allein neet ummer nuuedig te zeen. Stónderdigs saoves tróch de brandjwaer nag oet veur 'ne brandj in 'ne graaf langs de Sjaordiek in Neejwieërt.

E busjke zów inne brandj staon. De brandjwaer tróch mit mieëdere wages oet veur veur zat blöscapaciteit te zörge. Eine blöswage bleek genóg; de anger brandjwaerwages kóste drek weer heives gaon.

Saere begin van dit jaor zeen lenjelik al 1.920 meljinge gewaes van netuurbrenj, womit d'n tèller noe al hoger steit es in gans 2017. Doe wore gans biejein 1.645 meljinge. Allein al inne maondj julie (tösse 1 en 25 julie) woorte dit jaor 1.143 bós-, hei- en anger boetebrenj gemaljd, taenge 187 inne ganse maondj julie van 't veurig jaor.

Stónderdigs lejdje nag groeate vrenj in ónger anger 'ne bós in Mâres, kort euvere Limbörgse grens. De druuegdje guldj veur gans Nederlandj. Stónderdigs stinge te biespeel ouch de dunen op Sjiermonnikoug en 'nen aafvalberg in Varsseveld in vollervlaam.

De troeapische buie van dónderdig te spiet hèltj de druuegdje de kómmendjen tied nag aan. Vriedig wuuertj 't nag troeapisch werm, mit temperature van róndj de 36 à 37 graoje. Daonao keultj 't get aaf, meh blief 't kwik tonnag hange róndj de 30 graoje. Aventoe kan 'n bui valle, meh det is geine raenge van beteikenis.

Brónne[bewirk | brón bewèrke]



Dit artikel besleit aad nuujs.