Opvang 500 asielzeukers in evenementehal Aostrem

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Venlo - 14 december 2021, de gemeinte Venraoj geit op kórten termien 500 vlöchtelinge opvange. D'n evenementehal in Aostrem is daoveur as lokasie aangewaeze. Dao zulle de asielzeukers zó'n veer maonde verblieve.

De gemeinte haet dinsdaag van 't kabinet de opdrach gekrege d'n opvang van de asielzeukers te raegele.

't Kolleesj van börgemeisters en wethalders mót daoveur zörge det zoeë snel meugelik alle maotregele getróffe waere um d'n evenementehal klaor te make veur d'n opvang en begeleiding van vlöchtelinge.

"Weej zien zier verras door dees aanwiezing. Neteurlik weite weej allemaol det d'r sprake is van een noeëdsituasie beej d'n opvang van vlöchtelinge", zaet locobörgemeister Cor Vervoort. "De gemeinte Venraoj is ouk zeker bereid um eur verantwaordelikheid te neme, maar weej kinne de opdracht pas aanneme, as weej good in beeld hebbe waat dees aanwiezing veur ós gemeinte beteikent. Weej zitte mit vuuel vraoge."

De gemeinte haet nog vuuel vraoge. Zoeë is zeej nog neet euvertuug det d'n evenementehal ech geschik is veur de hoesvesting van asielzeukers. 't Leet namelik in "'n klein kerkdörp, naeve 'n GGD-priklokasie en 'n schoeël, doeënbeej 't spoor". Ouk vruueg de gemeinte zich aaf of dao überhaup waal 500 vlöchtelinge in d'n evenementehal gehoesves kinne waere mit alle veurzieninge die daoveur nuuedig zien.

't Is nog neet dutelik op welken termien de vlöchtelinge nao Venraoj zölle kómme. De Veiligheidsregio Limburg Noord, provincie Limburg en 't COA helpe de gemeinte Venraoj beej de veurbereidinge.

Toon Loonen, fraksieveurzitter van 't CDA in Venray, luuet aan L1 weite te verwieze nao 't persberich. "'t Ónderwerp is precair. Weej hebbe daorum mit de fraksieveurzitters aafgespraoke neet individueel te reagere." Ouk d'n dörpsraod van Aostrem wilt veurluipig gen reaksie gaeve. "Op dit moment is 't allein maar speculere. Det haet genne zin", luuet Jan-Willen Bruijsten, veurzitter van d'n dörpsraod, weite. Dinsdaagaovend um 19:30 oor steit 'n raodsvergadering op 't program in Venraoj. Wiewaal 't ónderwerp veurluipig neet op de agenda steit, wuurt 't meugelik waal bespraoke.

Brónne[bewirk | brón bewèrke]



Dit artikel besleit nuujs det zich recèntjelik haet aafgespeeldj.