Maan en hoond nao maonde doed gevoonde in woening

Van Wikinuujs

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


'n Straot in de wiek Kaberg

Mestreech - 10 mei 2021, in een flatwoening in Mestreech is tien daog geleie 't liechaam vaan 'ne 67-jäöregen bewoener gevoonde. Ouch zienen hoond waor doed. 't Lèste levesteike vaan de maan dateerde vaan haaf jannewarie.

Eine vaan de naobers vaan de portiekwoening in de wiek Kaberg alarmeerde de pelitie op 30 aprèl. Wie de agente in besjermende witte pakke de woening opende en binnegónge, kaom hen 'n pinnetrante loch tegemoot. Ze voonte 't liechaam vaan de bewoener in wiedgoonde staot van oontbinding. Op 't stoffelek euversjot zaote doezende vlege.

"Oonderzoek wees oet dat gein spraoke is vaan e misdrief. Dan hèlt veur us eder oonderzeuksbelaank op. Veer höbbe 't liechaam vervolges vrijgegeve aon de naobestaonde", zeet de pelitiewoordveurder.

Ouch d'n einjäörege Yorkshireterriër vaan de maan waor doed. Dee laog in zienen bench, woersjijnelek doedgegaange door oetdruging. "Iech höb nog wel get voor gevoonde, meh totaal gein water," vertèlt de zoon vaan de maan, dee 't hoes leegmaak. "Daoneve stoond d'n thermostaat op 24. Dus dan num iech aon tot heer is oetgedruug." Ouch d'n hoond waor aon 't oontbinde.

Ziene pap leefde 'n vrij trökgetrokke bestoon en kaom wieneg boete de deur, vertèlt de zoon, dee al maonde niks mie van ziene pap had gehuurd. "Veural in de weenter, umtot heer in Indonesië is gebore en 't ummertouw kaajd had in de winter. En dao kaom corona ouch nog ens bij. Heer heet us nog appjes gesjik mèt nuijaorswinse. Op 16 jannewarie heet emes 'm nog in de supermerret gezeen."

Volges de zoon zien de lèste suppermerretbönkes ouch van haaf jannewarie. Dat zouw beteikene tot heer circa dreieneinhave maond doed in zien woening heet gelege. De pelitie kint neet good aongeve wie laank de maan al doed waor veur heer woort gevoonde. "Gezeen de meneer boe-op veer häöm höbbe gevoonde al einegen tied."

De zoon vreug ziech aof wie ziene pap is gehiemeld, umtot häöm niks mankeerde. "Iech höb gein medicijne of zoe gevoonde, allein get keelbunekes. Iech hoop tot zienen hoesarts miech nog get kint vertèlle, dao zal iech binnekort ens laanksgoon"

Woeningverhuurder Servatius is vaan d'n doed op de huugde gebrach door de pelitie. "Veer zien es corporatie op de huugde vaan alle sterfgevalle in eus woeninge. De pelitie heet heibij de leiing en betrejt de woening es ierste. Vervolges melle zie 't euverlijje bij Servatius. Oet respek veur de femilie en naobestaonde geve veer wiejer gein infermasie."

De maan is verleie zaoterdaag gecremeerd.

Brónne[bewirk | brón bewèrke]



Dit artikel besleit aad nuujs en maak deil oet van oos arsjief van nuujsberichte.