In 't nuujs 2011

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich

---

In 't nuujs is 'n pagina op de Limburgse Wikipedia wo in kórt 't nuujs vannen daag opgesjreve wuuertj. Ómdet 't binne de idieë van Wikinuujs vèltj, höbbe weer dees pagina hie ouch. Völ gerös aan (gaer mit brónvermèljing!); hie of op Wikipedia. 'nen Angere gebroeker zal 't den euverdrage nao de wiki woor 't nuuj stökske nag neet op steit.

2011

december

29 december

• Nederlandj: 'ne Groeten brandj verwues theater Het Speelhuis in Helmond en versjendeleert de aanligkende kubushoezer. 't Theater wie de kubushoezer zien rieksmonumènte van de handj van Piet Blom.

24 december

• Kuns en cultuur: De Nederlandsen, in Duutsjlandj wirkenden actäör en zenger Johannes Heesters sjtörf op 108-jäörige laeftied.
• Oes-Europa: In Ruslandj weurt obbenuujs gedemonstreerd taege d'n oetsjlaag van de verkezinge ieder de maondj en taege de regering van Vladimir Poetin; 't protes is 't groetste saer de val van 't communisme.

23 december

• Religie: D'r paus Benedictus XVI makt bekènd dat Hildegard von Bingen in oktober 2012 es Kirklieërer in d'r Canon werd geneumd.
• Nederlands Limburg, Sjport: Ton Lokhoff geit as trainer aan de slaag bie VVV.

22 december

• Belsj: In de publieke sector weurt algemein gesjtaak taege de pensiónhervörminge van de regering-Di Rupo. Ónger mie 't treinpersoneel, de buschauffeurs, de cipere, 't lochhavepersoneel, 't óngerwiespersoneel en de luuj bie d'n ómroop lègke 't werk einen daag naer.

18 december

• Midde-Europa: Vaclav Havel, 'ne bunesjriever, pioneer in de Revoluties van 1989 en gewaeze presidènt van Tsjecho-Slowakije en Tsjechië, sjtörf op 75-jäörige laeftied.

17 december

• Oes-Azië: Kim Jong-il, saer 1994 dictator van Naord-Korea, sjtörf op (waorsjienelik) 70-jäörige laeftied.
• Afrika, Kuns en cultuur: De Kaapverdische zengeres Cesária Évora, bekèndj as 'keuningin van de morna', sjtörf op 70-jäörige laeftied.

16 december

• Nederlandj: Piet Hein Donner (CDA) weurt beneump tot vicepresident van de Raod van Sjtaote; zien partiegenoet Liesbeth Spies zal häöm opvolge as minister van Binnelandse Zakes.

15 december

• Frankriek: Awd-president Jacques Chirac weurt tot twie jaor veurwaerdelike gevangenis veroerdeild óm corruptie ('t creëre van sinecure) in zienen tied as börgemeister van Paries.
• Belsj Limburg: Tom Hompes, de vrundj van 't saer 'n jaor vermis Elke Wevers, weurt opgebrach.
• Kuns en cultuur: De Brits-Amerikaanse publicis Christopher Hitchens sjtörf op 62-jäörige laeftied.

13 december

• Belsj: De crimineel Nordine Amrani wirp granate en sjut mit e gewaer nao luuj oppe merret in Luuk. D'r zeen mèndestes vief doeaje gevalle, worónger den daojer. 123 luuj raakde gewóndj.

12 december

• Weitesjap: 't Wereldnatuurfónds maak bekèndj dat 'n expeditie nao de Mekongdelta 208 nuuj deersaorte haet opgelieverd.

10 december

• Belsj Limburg: In Opotere sjut 'ne jaeger ziene collega doeëd nao 'n oet de handj geloupe ruzing.

9 december

• Europa: Op 'nen top in Brussel weurt besjlote sjtrenger raegele aaf te sjpraeke veur 't financieel beleid van lenj, wie ouch belastinge aan de financiële sector op te lègke. David Cameron weigert in naam van 't Vereinig Keuninkriek te teikene.

6 december

• Belsj: De regering-Di Rupo I lèk d'n eid aaf; 541 daag nao de parlemèntsverkezinge haet 't Belsj daomit weer 'n regering.

4 december

• Ruslandj: Me hilt parlemèntsverkezinge. De regerende partie Vereinig Ruslandj haolt óngeveer de hèlf van de sjtumme en verluus daomit de twiederde mierderheid die ze de aafgeloupe jaore had.

1 december

• Duutsjlandj: Sjriefster Christa Wolf sjtörf op 82-jäörige laeftied.
• Belsj Limburg: Steve Stevaert nump óntsjlaag oet alle opebaar posities die hae haet.
• Nederlands Limburg: Winkelcentrum 't Loeën i Heële weëd toegedaon um insjtortingsgevieër.
• Belsj: De zès óngerhanjelaere käöre 't regeerakkaord good. Dit maak nao angerhauf jaor de waeg vrie veur 'n nuuj regering.

november

28 november

• Afrika: In Egypte waere parlemèntsverkezinge gehawwe. 't Zien de ierste democratische verkezinge in de lang historie van 't landj.
• Afrika: Ouch in Kongo-Kinshasa zeen verkezinge, veur 't parlemènt en de president.

27 november

• Midde-Oeste: D'n Arabische Liga nump mit 19 op 22 sjtumme sancties taege Syrië aan.

26 november

• Belsj: Op de 531sten daag nao de parlemèntsverkezinge lök 't de zes óngerhanjelende partieje ónger leiing van Elio Di Rupo asnog 'n begroeting op te sjtèlle. E nuuj kabinèt liek noe bald te kómme.

25 november

• Belsj, Economie: Standard & Poor's verlieg de rating van 't Belsj nao AA, mit negatief veuroetzichte. Dit gebäört nao 'n spectaculair sjtieging van de rente op sjtaotsobligaties de lèste daag.
• Afrika: In Marokko waere, veur 't iers saer de democratische hervörminge van ieder 't jaor, parlemèntsverkezinge gehawwe. De gemaotigde islamiste van de Partie veur Gerichtigheid en Óntwikkeling kómme mit 80 zetele in 't parlemènt en winne daomit de verkezinge; de opkóms laog róndj de 45%.

23 november

• Midde-Oeste: De president van Jeme, Ali Abdoellah Salih, is in ar-Rijaad um dao dan toch 't verdraag te óngerteikene womit hae aafsjtandj deit van de mach.

21 november

• Nederlands Limburg: D'n Academischen Hospitaal in Mestreech haet 'ne intösse opgehaeve opnamesjtop ingesjtèld veur ein van zien aafdeilinge, naodat 't norovirus is gevónge. Dit virus is de aafgeloupen tied op versjillende plaatse in de provincie aangetroffe, boete Mestreech ouch in Gebrook en Hael.
• Belsj: Formateur Elio Di Rupo bejt keuning Albèr II zien óntsjlaag aan; dae hilt dat in beraad en nump zich veur de volgenden daag mit de partiejveurzitters te gaon kalle.
• Nederlandj, Sjport: Hónkballer Gregory Halman weurt in Rotterdam vermaord, nao me dènk daor zie broor.
• Belsj, Kuns en cultuur: 't Tv-program Benidorm Bastards wèntj de Emmy Award in de category komedie.

20 november

• Belsj Limburg: In Kunsem (sjtad Tóngere) weurt de 51-jäörige politica Marina Nulens (Open Vld) daor häöre man vermaord.
• Zuud-Europa: Bie de parlemèntsverkezinge in Sjpanje haolt de conservatief Partido Popular de absolute mierderheid. De regerende socialiste van premier Zapatero verlere zjwaor.

19 november

• Afrika: Saif al-Islaam al-Qaddhafi, 'ne zaon van de gedoede Libische leisman Moe'ammar al-Qaddhafi, weurt in 't weustesjtedje Obari gepak. Allewel dat d'n Internationale Sjtraafhaof in D'n Haag häöm zeuk, wilt de Euvergankraod häöm in Libië laote berichte.

16 november

• Zuud-Europa: Mario Monti maak zie kabinèt bekèndj. 't Besjteit gans oet technocrate, Monti weurt behauve premier zelf ouch minister van financië en economische zakes.
• Nederlands Limburg: Sjinkerij De Bóbbel in Mestreech weurt tot de bèste kaffee vaan Nederland oetgerope.

12 november

• Zuud-Europa: Naodat de twie kamers van 't Italiaans parlemènt mit 't besjpaoringsplan höbbe ingesjtump, trejt Silvio Berlusconi wie belaof aaf as premier.

10 november

• Kuns en Cultuur: Andy Tielman, 'nen indorocker bekèndj van de Tielman Brothers, sjtörf op 75-jäörige laeftied.

8 november

• Weitesjap: 'n planetoïed mèt doorsnei vaan zoe'n 400 meter geneump 2005 YU55 vluig roond 23:30 Nederlandsen tied langs de Eerd, op 'nen aofstand vaan minder es d'n aofstand vaan de Eerd tot de Maon.
• Zuud-Europa: Premier Silvio Berlusconi van Italië besjlut naodat hae de mierderheid in 't Italiaans liegerhoes haet verlore óm binnekort aaf te trejje; 't parlemènt mót dan iers zien besjpaoringsplan goodkäöre.

7 november

• Belsj en Luxemburg: De bezunjer kamercommissie die de val van Dexia óngerzeuk begènt mit 't hure van Jean-Luc Dehaene en Pierre Mariani.
• Vereinigde Sjtaote: De jury ach Conrad Murray, de liefdokter van Michael Jackson, sjöljig aan dem zienen doed twie jaor geleie.
• Sjport: D'n Amerikaanse bókser Joe Frazier sjtörf op 67-jäörige laeftied aan laeverkanker.

6 november

• Zuud-Europa: De partieje van 't Greeks parlemènt besjlete tot de vörming van 'n regering van nationaal einheid zónger premier Jorgos Papandreou.

2 november

• Nederlandj, Kuns en cultuur: De Nederlandsen acteur en kemik Rijk de Gooyer sjtörf op 85-jäörige laeftied.

1 november

• Nederlandj/Nederlands Limburg: D'n Angolesen asielzuker Mauro Manuel, die saer jaore ien Aostrem woeënde, krieg van de Twieëde Kamer, óndanks waekelange proteste, gieën verlengde verbliefsvergunning.

oktober

31 oktober

• Nederlands Limburg, Natuur en milieu: De malbergovie (Proterorhinus semilunaris), 'nen exotische vèsj, weurt in 'n ziebaek van de Maas gevónge.

28 oktober

• Belsj en Luxemburg: De liberale politicus en ex-minister Willy De Clercq sjtörf op 84-jäörige laeftied.

27 oktober

• Europa: Nao 'n marathonvergaoring besjlete de zaevetien lenj van de Eurozaone veur de hèlf van de Greekse sjtaotssjöld aan private partieje aaf te sjrieve, en 't EFSF-noedfónjs op te hoege nao ein biljón euro.

23 oktober

• Zuud-Europa: In 't oeste van Turkieë, kortbie de sjtad Van, vèntj 'nen aerdsjóddel plaats mit 'n krach van 7,2 op de MM-sjaol. De daag tenao zalle hóngerde doeje valle.
• Afrika: In Tunesië vènje veur 't iers vriej verkezinge plaats. Me sjtump in 't landj veur 'n gróndjwèttelike raad.
• Sjport: Nuuj-Zielandj wèntj 't WK rugby in eige landj daor in de finaal Frankriek mit 8-7 te versjlaon.
• Duutsjlandj, Oesteriek en Zjwitserlandj: Bie verkezinge in Zjwitserlandj verluus de extreemrechse Zjwitserse Volkspartie ónverwach.
• Zuud-Amerika: Bie presidentsverkezinge in Argentinië weurt de zittende Cristina Kirchner al in de ierste runj mit absolute mierderheid gekoze.
• Sjport: Bie 'n óngelök op de baon in Sepang, Maleisië, kump de 24-jäörigen Italiaanse motorrènner Marco Simoncelli óm.

22 oktober

• Midde-Oeste: Sultan bin Abdoelaziez as-Sa'oed, kroenprins vaan Saoedi-Arabië en broor van keuning Abdoellah, sjtörf op 83-jäörige laeftied.
• Economie, Nederlandj: Óngernummer Morris Tabaksblat, ex-veurman van Unilever en opsjtèller van de nao häöm geneumde gedraagscode, sjtörf op 74-jäörige laeftied.

21 oktober

• Belsj Limburg: Ronald Janssen, sjöljig bevónge aan maord, verkrachting, vrieheidsberuiving en foltering, weurt daor d'n tribbenaal in Tóngere tot laeveslang gevangenis en tien jaor tbs veroerdeild.

20 oktober

• Afrika: Sjtriejers van de NER vereuvere Sirte. Versjillende sjtriejers van de aw regering perbere te vlöchte, wo-ónger Moe'ammar Qaddhafi zelf, dae daobie ómkump.
• Belsj Limburg: In 't perces-Janssen verklaort de jury Ronald Janssen sjöljig aan alle aanklachte die häöm te las waere gelag - dit zeen drie [[<aord|maord]]e, verkrachting, vrieheidsberuiving en foltering.

17 oktober

• Nederlands Limburg, Weitesjap: Bij Se-Gietere weure archeologische voondste gedoon vaan tösse 70.000 en 100.000 jaor aajd, die aon Neanderthalers kinne weure touwgesjreve.
• Afrika: Sjtriejers van de Libische NER (Nationaal Euverganksraod) pakke Bani Walied, 'n sjtad totnogtoe gooddeils in henj van Qaddhafi-aanhengers.

16 oktober

• Frankriek: François Hollande weurt in 't volksraadplaeging tot presidèntskandidaat van de Franse Socialistische Partie gekoze.

15 oktober

• Sjport: 't Nederlands hónkbalteam wintj op de WK in Panama goud door Cuba te versjlaon. 't Is d'n ierste kier dat 'n Europese plóg dit lök.

14 oktober

• Midde- en Zuud-Amerika: De Cubaanse minsjerechteactivistin Laura Pollán, baeter bekèndj as 'de vrouw in 't wit', sjtörf op 63-jäörige laeftied.

13 oktober

• Belsj en Luxemburg: De óngerhanjelinge veur 't regeerakkaord gaon wiejer zónger Groen! en Ecolo. Hiedoor haet de beüigde coalitie gein mierderheid aan Vlaomse kantj.
• Belsj en Luxemburg, Economie: Sjtaolbedrief ArcelorMittal zaet ziene werme bandj in Luuk toe te gaon doon. Dit zouw 't èndj van de sjtaolindustrie in die sjtad beteikene.
• Zuud-Azië: Keuning Namgyel Wanchuck (30) van Bhutan troewt in Punakha mit de sjtudentin Jetsun Pema (20).

11 oktober

• Nederlands Limburg: 't OM geit in hoager beroep in de zaak-Anita C.
• Belsj en Luxemburg: De óngerhanjelaere euver 'n nuuj regering ónger leiing van Elio Di Rupo kunjige 't zoegeneump Vlinderakkaord aan, wat ludiek zoe weurt geneump nao 't krevetje (nóndedzjuke, vlinderdas) van de beüigde premier. 't Akkaord raegelt de zesde sjtaotshervörming; hiemit is 't communautair deil van de óngerhanjelinge veurbie.
• Oes-Europa: Joelija Timosjenko, ex-premier van de Oekraïne, weurt tot zaeve jaor gevangenis veroerdeild. Binnelands en boetelands sjprik me van e politiek perces in naam vaan president Viktor Janoekovitsj.
• Midde-Europa, Economie: 't Slowaaks parlemènt wies de nuuj sjief van sjteun aan Grekelandj aaf; de regering trejt dao-op aaf.
• Afrika: In Liberia zeen presidèntsverkezinge.

10 oktober

• Belsj en Luxemburg, Economie: Nao 'n nach van óngerhanjelinge besjlete 't Belsj, Luxemburg en Frankriek veur de bank Dexia te nationalisere. Ouch weurt 'n bad bank gemaak, woeveur 90 miljard garantsjtèlling (daovan 54 miljard door de Belzje sjtaot) weurt vasgelag.
• Economie, Weitesjap: De Nobelpries in de economie geit nao de Amerikane Thomas J. Sargent en Christopher A. Sims, óm hun empirisch óngerzeuk nao oerzaak en gevolg in de macro-economie.

9 oktober

• Afrika: Bie e protes van Kopte nao aanleiing van extremistisch geweld taege ze houwt 't laeger op ze in; daobie valle 24 doeje en hóngerde gewónje.
• Midde-Europa: Bie parlemèntsverkezinge in Pole wèntj de regerende liberaal partiej van premier Donald Tusk. De centrumlinkse Palikot-bewaeging kump nuuj in de Sejm.

7 oktober

• Naord-Europa/Afrika/Midde-Ooste: De Nobelpries in de vrei geit nao de Liberiaanse Ellen Johnson-Sirleaf (presidentin van dat landj) en Leymah Gbowee zoewie nao de Jemenitische Tawakkul Karman, óm hunne sjtried veur vrouwerechte.

6 oktober

• Kuns en cultuur: De Nobelpries in de literatuur weurt toegekèndj aan de Zjwaedse sjriever en dichter Tomas Tranströmer.
• Belsj Limburg: 't VRT-program Panorama brèngk 'n ómvankrieke cultuur van cliëntalisme bie de Hesselse polies aan 't leech. Ouch 't hanjele van börgemeister Hilde Claes weurt aafgekäörd.

5 oktober

• Weitesjap, Economie: Steve Jobs, de groete maan achter technologiebedrief Apple, störf op 56-jaorege leeftied.
• Weitesjap: De Nobelpries in de sjemie weurt toegekèndj aan d'n Israëliër Daniel Shechtman, óm zien óntdèkking van quasikristalle.
• Belsj en Luxemburg: Deep in de nach bereike de óngerhanjelaere veur 'n nuuj regering 'n akkaord euver de splitsing van 't gerichtelik arrondissemènt BHV.

4 oktober

• Wikipedia: Oet protes taege e nuuj wètsveursjtèl euver laster, wat websites gemekkelik van 't web zouw kónne haole, lèk zich de Italiaanse Wikipedia plat.
• Weitesjap: De Nobielpries in de natuurkónde weurt toegekèndj aan Saul Perlmutter, Brian P. Schmidt en Adam G. Riess veur hun óngerzeuk nao de oetzètting van 't universum aan de handj van supernova's.

3 oktober

• Weitesjap: De Nobelpries in de genaeskónde weurt toegekèndj aan d'n Amerikaan Bruce Beutler, de Luxemburger Jules Hoffmann en de Canadees Palph Steinman, veur hun óngerzeuk nao 't immuunsysteem. Steinman bliek aevel zjus te zeen gesjtorve; nao de raegele van 't Comité maag de Nobelpries neet postuum waere toegekèndj.
• Nederlands Limburg: Bie 'n óngelök op de Maas bie Kuuk (Noord-Braobant) veurt 'ne speedboot op 'n vrachtschip. Vier van de saeve opvaorende verdrinke; se kómme uut Gennep, Otersóm en Offere.

september

29 september

• Kuns en cultuur: De Nederlandse sjriefster Hella Haasse sjtörf op 93-jäörige laeftied.

28 september

• Belsj en Luxemburg: De óngerhanjelaere veur 'n nuuj federaal regering sjtèlle de begroeting veur 2012 op. Algemein waort de lèsten tied gedach dat de regering-Leterme dit nog hej mótte doon.

27 september

• Nederlands Limburg: De tribbenaal in Mesjtreech sjprik Anita C. oet Gelaen vriej van kènjermaord of -doadsjlaag.
• Nederlandj, Economie: In de 'Wintergreunzaak' taege de plegers van groetsjalige bouwfraude waere versjillende miejäörige gevangenissjtrafe geëis.

26 september

• Kuns en cultuur: De Nederlandse bluesmusicus Harry Muskee, bekèndj van Cuby and the Blizzards, sjtörf op 70-jäörige laeftied.
• Afrika: Nobielprieswinneres Wangari Maathai oet Kenia sjtörf op 71-jäörige laeftied.

25 september

• Zuud-Europa: In de arena van La Monumental in Barcelona vèntj 't allerlèste deuregevech plaatsj. Catalonië geit de gevechte per 1 januari 2011, as twiede regio in Sjpanje, verbeje.
• Belsj en Luxemburg: De radicaal Franstalige partiej FDF verliet de alliantie mit de MR.
• Sjport: Patrick Makau Musyoki oet Kenia löp in Berlien e waereldrecord op de marathon: 2.03.38.

24 september

• Belsj en Luxemburg: Nao 'n marathonzitting van bekans 'n etmaol kómme de óngerhanjelaere veur 'n Belzje regering tot 'n akkaord euver 'n nuuj financeringswèt.

23 september

• Weitesjap: Bie 't CERN in Genève, Zjwitserlandj, maak me bekèndj dat me in 'n experimèntj mit neutrino's sjnelhede haet gemaete hoeger as de sjnelheid van 't leech. As de maetinge richtig zeen, beteikentj dees anomalie 'n revolutie in de natuurkónde.
• Midde-Oeste: Presidentj Mahmoed Abbaas vreug in New York volwaerdig lidmaotsjap van de VN aan veur Palestina.

22 september

• Belsj en Luxemburg, Natuur en milieu: Kort nao Nederlandj weurt ouch in 't Belsj weer 'ne wouf gezeen, en wel bij Gedinne (provincie Name) zoe make mitwirkers van 't tv-program Dieren in Nesten bekèndj.

21 september

• Afrika: De Nationaal Euverganksraod van Libië melt dat Sabha, ein van de drei euvergebleve groete bolwerke van Qaddhafi, is gevalle.
• Belsj en Luxemburg: Bie de regeringsóngerhanjelinge maak me 'n akkaord euver (beperkde) hervörminge in Brussel.

20 september

• Belsj Limburg: In Tóngere begèntj 't perces taege Ronald Janssen, dae van drie maorde op jónkvolwassene weurt verdach.

18 september

• Duutsjlandj: Bie deilsjtaotsverkezinge in Berlien liejt coalitiepartiej FDP, die zelfs neet de keesdörpel haolt, 'n zjwaor naerlaog. CDU wèntj mer lich, SDP verluus lich. De Piratenpartei kump nui in de landsdaag.

17 september

• Nederlandj, Sjport: In de sjeem van de wèdsjtried taege De Graafschap valle zoe'n 50 koej supporters van Feyenoord 't Maasgeboew (boe 't besjtuur van de club zit) aan, oet ónvrei euver 't beleid van de aafgeloupe jaore. De polies trèk häör gewaere óm ze trök te dringe.
• Naord-, Midde- en Oes-Europa: In Letlandj wèntj 't pro-Russisch Harmonisch Centrum de parlemèntsverkezinge.

15 september

• Weitesjap: Biologe ómsjrieve 'n nuuj dolfienesaort, besjtaonde oet dere die veurhaer veur gewoen toemelaere waorte aangezeen. De saort krieg de naom Burrunandolfien (Tursiops australis).
• Kuns en cultuur: Bluegrass/oldtimemusicarties Wade Mainer, bekèndj van de Sons of the Mountaineers, sjtörf op 104-jäörige laeftied.
• Naord-, Midde- en Oes-Europa: De parlemèntsverkezinge in Daenemark waere daor 't links blok gewonne; me verwach dat Helle Thorning-Schmidt, leisvrouw van de sociaal-democratische partie, de ierste vrouweleke premier van 't landj weurt.

14 september

• Belsj en Luxemburg: Nao e dramatisch appel en 't in de gauwigheid trökkiere oet Nice door de Keuning wèt formateur Elio Di Rupo e communautair akkoord te make. Dit hilt ónger mie de sjplieting van BHV in.
• Nederlandj, Zuudoes-Azië: D'n tribbenaal in D'n Haag sjtilt de Nederlandse sjtaot aansjpraokelik veur 't bloodbaad in Rawagedeh, Indonesië, wat in 1947 bie de Politioneel Acties woort aangerich, en verplich häöm de nog laevende wedevrouwe te compensere.

13 september

• Nederlands Limburg: 't Opebaar Ministerie eis in de zaak taege de Gelaense Anita C. ach jaor gevangenis. 't Weurt verdach van meërvoudige kènjermaord.
• Belsj Limburg: Op 'n bös in Diepenbik vilt 'ne passageer 'ne controleur aan mit e sjtroumsjtoetwaope.

12 september

• Sjport: Novak Djokovic wèntj de finaal van de US Open bie de mansluuj taege Rafael Nadal in veer sets (6-2, 6-4, 6-7, 6-1).

11 september

• Sjport: De Runj van Sjpanje van 2011 weurt gewonne door de Sjpanjool Juan José Cobo. Bèste Nederlanjer is Bauke Mollema (veerde plaatsj en winner van 't punteklassemènt), bèste Belsj is Maxime Montfort (op zes).
• Sjport: 't Tennisternoej van de US Open weurt bie de vrouwluuj gewonne door de Australische Samantha Stosur, die in twie sets van de favoriet Serena Williams wèntj.

10 september

• Afrika: De vaerboot van Zanzibar nao Pemba, Tanzania, zènk mit 500 luuj aan baord. Mier es hóngerd doeje valle; versjillende angere waere nog vermis.

9 september

• Afrika: De Libische opstenjelinge trèkke Bani Walied in, eint van de lèste bolwerke van Qaddhafi.
• Weitesjap: In Zuud-Afrika zeen reste gevónge van 'n aapminsesaort die me Australopithecus sediba neump. De bouw van de saort is taege d'n achtergróndj van anger aapminse anomaal.

8 september

• Natuur en milieu: 'nen Aerdsjóddel van 4,5 op de herzeen Sjaol van Richter, mit 't epicentrum tösje Goch en Sante (Xanten), weurt in deile van Nederlandj en Duutsjlandj, neet in 't minste Nederlands Limburg, geveuld.

7 september

• Zuud-Azië: Bie 'ne bómaansjlaag kortbie d'n Hoeggerichshaof in Delhi, India, valle zaeker neuge of ilf doeje.
• Oes-Europa: Bie Jaroslavl in Ruslandj sjtort e vleegmesjien neer mit 't plaatsjelik ieshockeyteam aan baord.

6 september

• Economie: De Zjwitserse nationaal bank waardeert de Zjwitserse frank aaf en sjtilt 'ne minimumkoers van E1,20 per frank vas. Door sjpeculatie waor de munt óngecontroleerd in waerde gesjtege.

5 september

• Frankriek: In Paries begèntj e proces taege Jacques Chirac, dae weurt verdach van corruptie in zienen tied as börgemeister van de huidsjtad. De besjöljeigde is zelf neet debie, ómdat hae door e herse-imfark neet in sjtaot zouw zeen 't proces te volge.
• Nederlands Limburg: Twie Belzje 'carjackers' weure in Mestreech nao 'n wèl achtervolging aongehawwe.

4 september

• Sjport: Op de WK Atletiek löp de plóg van Jamaica e nuuj waereldrecord op de 4×100 maeter estafèt: 37,04 secónde.
• Nederlands Limburg: 'nen Awd-verplaeger zaet dat 'ne broeder in d'n inrichting Sint-Joezep in Hael óngevaer twintig gehandicapde kènjer haet vermaord. Nao de insjtilling leep al 'n óngerzeuk.

2 september

• Belsj, Kuns en cultuur: De Vlaomse prizzentator Tony Corsari sjtörf op 84-jäörige laeftied.
• Midde-Oeste: Veuroetloupend op e te versjiense rapport euver 't flotilla-incidènt van 2010 sjort Turkije de samewirking mit Israël op.
• Europa/Midde-Oeste: De Europese Unie sjtilt 'n olieboycot in taege Syrië, oet protes taege minsjerechtesjènninge door 't rezjiem.
• Sjport: 't Nederlands hierevootbalilftal haolt in 'n kwalificatiewèdsjtried taege San Marino 't rizzeltaat van 11-0; dit is de groetse euverwinning oets veur de ploog.
• Weitesjap: Óngerzeukers make bekèndj dat 't aafgeloupe waekindj bie Duiven (provincie Gelderlandj) 'ne wouf is gezeen. 't Is veur 't iers saer 1897 dat dae weer in 't land veurkump.

augustus

31 augustus

• Nederlands Limburg, Braobants Limburg, Nederlandj: Door bezuniginge op 't ministerie van Defensie mótte de kazèrn in Buul en twie in D'n Haag sjlete. De KMS in Wieërt weurt verplaatsj nao Ermelo (provincie Gelderlandj) en e financieel ketoer in Egelse weurt verplaatsj nao örges angers in Zuud-Limburg.
• Belsj Limburg, Sjport: STVV óntsjleit zienen trainer Guido Brepoels.

30 augustus

• Oes-Azië: Yoshihiko Noda weurt bevestig as nuje premier van Japan. Hae volg Naoto Kan op, dae ieder aaftraoj nao de kernramp in Fukushima.
• Sjport, Belsj: Kevin Borlée haolt bij 't Waereldkampiónsjap Atletiek in Daegu, Zuud-Korea, 'n brónze medalje op de 400 maeter sjprint. Zie twielingbroor Jonathan löp de finaal ouch en weurt viefde.
• Belsj Limburg: De commerciële tv-zenjer 2BE geit 'n Vlaomse versie van 't Nederlands amusemèntsprogram Oh Oh Cherso make mit ach Limburgers.

29 augustus

• Sjport, Belsj Limbörg: Mario Been, gewaeze trainer van Feyenoord, weurt aangesjtèld bie Racing Genk.

26 augustus

• Midde-Amerika: In e casino in Monterrey, Mexico, kómme te minste 53 luuj óm bie 'ne grenaataansjlaag.

24 augustus

• Sjport: Veur 't iers in zien historie sjteit 't Nederlands hierevootbalilftal op de ierste plaatsj van de FIFA-Waereldranglies.

23 augustus

• Afrika: De rebelle van de Libische euverganksregering numme 't huidkerteer van Moe'ammar Qaddhafi in Tripoli in; de leisman zelf is dao neet te vènje.

20 augustus

• Natuur en milieu: Orkaan Irene kump aan landj bie de Klein Antille. De kómmende daag zal 'r nog euver de Groete Antille, de ooskös van de Vereinigde Sjtaote en Canada trèkke.

19 augustus

• Belsj Limburg: Pukkelpop, e popfestival bij Hasselt, weurt gestop naotot, wie oetindelek vasgestèld, veer doeje zien gevalle es gevolg vaan e zwoer oonweer.

14 augustus

• Sjport: D'n Duutsje, in Nederlandj wirkende voetbaltrainer Fritz Korbach sjtörf op 66-jäörige laeftied aan keelkanker.

10 augustus

• Nederlands Limburg: I Heële brengk inne sjportsjaol aaf, 't valle ging sjlachopfere.

6 augustus

• Vereinig Keuninkriek en Ierlandj: In Lonje begènne relle tösse jóngere en de polies, mit irnstige rinneweringe en plunjeringe. De ónras sjleit de volgende daag euver nao anger sjtei in Èngelandj.

5 augustus

• Belsj Limburg: De Bilzer politica Erika Thijs sjtörf op 51-jäörige laeftied aan kanker.
• Vereinigde Sjtaote, Economie: De kredietsjatter Standard & Poor's verlieg veur 't iers de kredietwaerdigheid van de Vereinigde Sjtaote, van AAA nao AA+. De ummer oploupende sjtaotssjöld, de politiek óneinigheid dao-euver en de ummer dorende economische crisis zouwe de aaflossing ónzaeker make.
• Nederlands Limburg: D'r va witwèsje verdachte Kirchröadsje maacheleër Joep J. weëd oppe sjtroas neërjesjtóche.

3 augustus

• Afrika: Ex-presidentj Hosni Moebarak van Egypte sjteit in Caïro terech op verdènking van corruptie en doejelik geweld taege betogers.

2 augustus

• Vereinigde Sjtaote: 't Amerikaans Congrès käört e besjpaoringsplan en 'n ophoeging van 't zgn. sjöljeplafóng good. Hiedoor weurt 'n acute crisis róndj euverheidsbetalinge veurkómme. Zoewel ónger progressief Democrate as ónger conservatief Republikeine gief 't bezjwaore.
• Nederlands Limburg: Beej 'n asielzeukerscentrum in Ech sjtiktj 'nen asielzeuker oet Liberia zichzelf in brandj.

Nuuds

</noinclude>

31 juli

• Midde-Oeste: De Syrische regering begèntj 'n offensief taege Hama, 'nen haerd van verzèt taege presidèntj Basjar al-Assad.

29 juli

• Zuud-Europa: De ganse Turkse laegertop sjtap op, nao me dènk oet ónvrei euver de regering.

28 juli

• Belsj: Belgacom-topman Didier Bellens weurt besjöljig van passief corruptie.
• Afrika: Abdoel Fatah Joenis, de militaire leisman van de Libischen opsjtandj, weurt op 67-jäörige laeftied doedgesjote.

26 juli

• Nederlands Limburg: Door e laek in de waterleiing bie Zjweikese kump in groate deile van Zuud-Limburg gei water oet de kraan.

25 juli

• Nederlands Limburg: Beej 't Sint Jans Gasthoes in Wieërt wuuërtj de MRSA-bacterie gevónge, wo-op 'n opnamestop volgtj.

24 juli

• Nederlands Limburg: Beej Baoksem vluug 'n autobedrief in de brandj. De N 280 denaeve mót waere aafgezatj.
• Sjport: D'n Australiër Cadel Evans wèntj de 98e Runj van Frankriek.

23 juli

• Kuns en cultuur: De Britse zengeres Amy Winehouse sjtörf op 27-jäörige laeftied.
• Kuns en cultuur: De Nederlandse sjlagercomponis, producent en zenger Johnny Hoes sjtörf op 94-jäörige laeftied.
• Oes-Azië: In Wenzhou, China, sjtörve tientalle luuj nao 'n botsing van twie hoegesjnelheidstreine.

22 juli

• Naord-Europa: In 't regeringskerteer van Oslo vèntj 'ne zjwaore bómaansjlaag plaats; later weurt op 'n partiejbiejeinkóms van de Arbeierspartiej kortbiej e bloodbad aangerich. Bei acties liekene in 't bezunjer gerich taege de Noorse premier Jens Stoltenberg. 'nen Dènkeliken daojer weurt aangehauwe; 't geit óm 'ne rechs-extremis.

21 juli

• Weitesjap: Mit de lanjing van de Atlantis (STS-135) löp nao dertig jaor 't Spaceshuttleprogram aaf.
• Europa, economie: Op 'nen top in Brussel weurt beslote tot nuuj sjteunmaotraegele veur Griekeland. Besjlote weurt ónger mie dat ouch banke gaon biedrage.

20 juli

• Oes- en Zuudoes-Europa: Goran Hadzic, de lèsten oerlogscrimineel dee de Joegeslaviëtribbenaal in D'n Haag nog zeukde, weurt gearresteerd.
• Afrika: De Vereinigde Naties rope in twie Somalische regio's officieel d'n hóngersnoed oet. In d'n Hore van Afrika hiers dit jaor 'n óngewoen druugde.
• Kuns en cultuur: De Britse realistische sjilder Lucian Freud sjtörf op 88-jäörige laeftied.

19 juli

• Groet-Brittannië en Ierlandj: Brits Liegerhoes begèntj 'n huurzitting euver aafloestersjendal bij sensatiegezètte van News Internatioal. Ónger mie Rupert Murdoch weurt verhuurd.

18 juli

• Nederlandj, Kuns en cultuur: D'n acteur en komiek John Kraaijkamp sr. sjtörf op 86-jäörige laeftied.

17 juli

• Sjport: 't WK voetbal veur vrouwluuj weurt gewónne door Japan, wat nao penantiesjotte de VS versjleit.
• Groet-Brittannië en Ierlandj: Rebekah Brooks, jaorelank in topfuncties verbónge aan de gezètte van News International, weurt gearresteerd op verdènking van sjöld aan ónethische praktieke.

15 juli

• Sjport, Belsj Limburg: Jelle Vanendert oet Haëmet-Achel wèntj 'n etap in de Runj van Frankriek en krieg daomit de bölkestrieko.

13 juli

• Zuud-Azië: In Bombay, India valle biej bomaansjlaeg versjillende doeje. Dees acties rappelere aan de aansjlaeg in dezelfde sjtad in 2008.
• Kuns en cultuur: Harry Potter and the deadly hallows, de lèste film oet d'n Harry Potter-cyclus, weurt oetgebrach. Binne ein waek zal 'r versjillende waereldwiej records braeke.

9 juli

• Afrika: Zuud-Soedan verklaort zich ónaafhenkelik van Soedan es gevolg van e referendum ieder dit jaor.

7 juli

• Groet-Brittannië en Ierlandj: De Britse boulevardgezèt News of the World hèlt op te publicere nao e sjendal euver ónethische nuujsgaring; zóndig 10 juli zal volges eigenaer Rupert Murdoch 't lèste nómmer versjiene.
• Nederlandj: Biej verboewinge aan de Grolsch Veste, 't sjtadion van voetbalclub FC Twente oet Enschede, kump 't daak nao ónger, wodoor twie doeje en veertien gewónje valle.

6 juli

• Nederlands Limburg: Mary-Anne Goossen oet Rooj weurt nao achtien daag vermissing gevónje in de berg biej Malaga (Sjpanje).

4 juli

• Belsj: Formateur Elio Di Rupo (PS) publiceert 'ne nota dae mót leie tot de vörming van 'ne regering. De linkse partieje aan twie kante acceptere häöm, de liberale twievele, de N-VA biej mónje van Bart De Wever wies de nota drie daag later aaf.

3 juli

• Sjport: Novak Djokovic oet Servië wèntj 't tennisternoej van Wimledon biej de mansluuj.
• Zuudoes-Azië: Biej de verkezinge in Thailand wèntj de populistische Pheu Thai.

2 juli

• Sjport: Petra Kvitová oet Tsjechië wèntj 't tennisternoej van Wimbledon biej de vrouwluuj.

1 juli

• Afrika: In Marokko weurt e referendum euver 'n nuuj gróndjwèt mit groete opkóms en mierderheid aangenome. De nuuj constitutie brejt de mach van 't parlemènt en de regering oet en maak 't Berbers 'n officieel taal naeve 't Arabisch.

juni

5 juni

• Sjport: Rafael Nadal oet Sjpanje wèntj veur de zesde kier 't tennisternoej van Roland Garros.

4 juni

• Sjport: Tennisster Li Na oet China wèntj in 'n finaal taege Francesca Sciavone (6-4, 7-6) 't ternoej van Roland Garros. 't Is veur 't iers dat 'ne Chinees e grand slamternoej wèntj.

3 juni

• Nederlands Limburg: I Gebrook brink inne psyschisch gesjteurde man zienge flatgenoeët um, woeënao de polies häöm doeëdsjut.

2 juni

• Nederlandj: Prizzentator Willem Duys sjtörf op 82-jäörige laeftied aan 'n lónginfectie.
• Duitsland: In Duitsland störf de 17e persoen ten gevolge vaan besmetting mèt 'ne - nuie - gevaarleke variant vaan de EHEC-bacterie. Ouch in Zwede is 'ne doeje gevalle.
• Nederlands Limburg: De vrouw oet Kelpe-Oler die same mit häöre vrundj häör kèndj seksueel had misbroek weurt in hoeger beroop veroerdeild tot 7 jaore opsjleting en tbs; dit is mier as wat d'n tribbenaol in iersten aanlag had opgelag.

mei

29 mei

• Sjport: VVV Venlo hilt zich in de Ieëredivisie door 'n 2-2 geliekspeul in Venlo taege FC Zwolle. Dit waas genóg nao de 1-2 wins ieëder in Zwolle.

27 mei

• Belsj Limburg: 't Gouvernemènt sjtilt veur alle bósse in de provincie code 'roed roed' in, wat ze tot verboje gebeed veur bezeukers maak. Dit óm bósbrenj te veurkómme.

26 mei

• Oes-Europa: In e dörpke in Vojvodina, Servië, weurt de Bosnisch-Servische generaol b.d. Ratko Mladic gearresteerd. Hae weurt gezoch daor de Joegoslavië-tribbenaal óm kreegsmisdaoje in de Joegoslavische kreeg van de jaore neugetig.

25 mei

• Belsj/Nederlandj: Op de Kalmthoutse Hei, mit naome op 't Vlaoms deil, brentj in twie daag óm de 600 hectaar bós en hei aaf. De brandj waor óntsjtange door de extreem druugde.

22 mei

• Vereinigde Sjtate: In Joplin, Missouri, vèntj 'nen tornado plaats van óngewoene krach en ómvank dae mier as 100 doeje eis en enorm materiaal sjaoj aanrich.

21 mei

• Belsj Limburg: In Mechele waere drie leje van de motorbenj Outlaws vermaord, hun lieke waere bie Aësde gevónge.

17 mei

• Sjport: Racing Genk is landskampión voetbal van 't Belsj, nao 't wènne van 'n play-offwèdsjtried taege Standard Luuk.

16 mei

• Belsj: Mit Elio Di Rupo beneump keuning Albèr II van 't Belsj veur 't iers nao de verkezinge van juni 2010 'ne formateur.

15 mei

• Sjport: Ajax weurt veur d'n dertigste kier kampión vootbal van Nederlandj en haolt daomit as ierste club de 'derde sjter'. Roda JC weurt zesde, VVV Venlo ènjig op de zeventiende plaats.

14 mei

• Frankriek/Vereinigde Sjtate: Dominique Strauss-Kahn, veurzitter van 't IMF, weurt in New York gearresteerd op verdènking van aanranjing en poging tot verkrachting.

9 mei

• Sjport: De Belzje fietserènner Wouter Weylandt sjtörf op 26-jäörige laeftied nao 'ne val in de derde etap van de Runj van Italië.

5 mei

• Groet-Brittannië en Ierlandj: Claude Choules, de lèste veteraan oet d'n Ierste Waereldkreeg, sjtörf op 110-jäörige laeftied.

3 mei

• Nederlandj: D'n tribbenaal in Leeuwarden veroerdeilt Sietske H. oet Nij Beets (gemeinte Opsterland) tot twelf jaore opsjleting óm de maord op häör veer eige pasgebaore kènjer.

1 mei

• Nederlandj: Ralf Krewinkel (PvdA) weurt börgemeister in de Limburgse gemeinte Baek.
• Zuud-Azië: De VS melle biej mónje van Obama dat terroris Osamah bin Ladin is geliquideerd in 'n gerichde actie van 't Amerikaans laeger.
• Zuud-Europa: Johannes Paulus II, paus van 1978 tot 2005, weurt in Roeme zielig verklaord.

april

30 april

• Afrika: Volges de Libische regering is 'ne zaon van leisman Moe'ammar al-Qaddhafi, Saif al-Arab al-Qaddhafi, op 29-jäörige laeftied ómgekómme biej 'ne NATO-aanval.
• Nederlands Limburg: Keuninginnedag deit dit jaor Toear en Wieërt aan.

29 april

• Vereinig Keuninkriek en Ierland: Ónger enorm mediabelanksjtèlling troewt prins William mit Kate Middleton.

12 april

• Ruimtevaart: viefteg jaor geleie woort Joeri Gagarin es ierste mins in 'n baon um de Eerd gebrach. Daarteg jaor geleie woort d'n ierste Space Shuttle gelanceerd.

9 april

• Nederland: 'ne 24-jaorege inwoener vaan Alphen aan den Rijn sjut mèt 'n automatisch waope in e winkelcentrum op ederein dee heer tegekump. In totaal valle zeve doeje, inclusief de sjötter, dee ziech vaan 't leve benump. 't Gief nog versjeie gewonde, boe-oonder zwoergewonde, lui.

miert

23 miert

• Kuns en cultuur: De Brits-Amerikaanse actries Elizabeth Taylor sjtörf op 79-jäörige laeftied.

22 miert

• Kuns en cultuur: De Nederlandsen theater, tv- en filmacteur Hans Boskamp sjtörf op 78-jäörige laeftied.
• Duutsjlandj: D'n tribbenaal in Koblenz veroerdeilt Detlef S. tot 14 jaor en zes maond gevangenis óm zjwaor seksueel misbroek van zien eige kènjer.

21 miert

• Kuns en cultuur: D'n Amerikaanse Bluespianis Pinetop Perkins sjtörf op 97-jäörige laeftied. De man had ieder dit jaor nog 'ne Grammy Award gewonne.

19 miert

• Afrika: In Egypte vèntj e referendum plaatsj euver 'n gróndjwètsverangering die de democratie mót inveure. Väöl revolutionaire zien taege de aard van de verangeringe.

18 miert

• Afrika: De VN-Veiligheidsraod nump 'n resolutie aan taege 't bewèndj van de Libische kolonel Moe'ammar Qaddhafi, mit ónger mie e wiedgaond vleegverbod. 't Bewèndj zaet zich draan te zalle hawwe; de volgenden daag kómme aevel al berichte euver sjendinge nao boete.

16 miert

• Economie: Albert Heijn deit zienen ierste supermerret op 't Belsj ope, in Brasschaat (provincie Antwerpe).

11 miert

• Oes-Azie: Ouch de weskös vaan Japan weurt getroffe door 'ne zwoeren eerdsjók.
• Oes-Azië: Japan weurt getroffe door 'nen henjig zjwoeren aerdsjóddel en tsoenami. In de daag dao-op óntsjtaon zjwaor probleme bie de kerncentrale Fukushima I., mit meugelik kernsjmiltinge, woebie doejelike doses ioniserende sjtraoling vriekómme.

10 miert

• Frankriek/Afrika: Frankriek erkèntj as ierste landj de raod van de Libischen opsjtandj as wèttelike regering van Libië.

7 miert

• Frankriek: E perces waeges corruptie taege ex-presidentj Jacques Chirac begèntj. De feite zouw zien gedaon in zienen tied as börgemeister van Paries.

6 miert

• Belsj en Luxemburg: commissair-generaal van de federaal polies Fernand Koekelberg sjtap op nao commotie euver misbroek van gemeinsjapsgeld.

4 miert

• Weitesjap: Kernfysicus Simon van der Meer, dae in 1984 de Nobelpries in de natuurkónde haet gewonne, sjtörf op 85-jäörige laeftied.

2 miert

• Afrika: In 'n poging de mach trök te kriege zèt de Libischen dictator Qaddhafi e taege-offensief in.
• Nederlandj: Verkezinge waere gehawwe veur de Provinciaal Sjtaote. De coalitie van 't kabinet-Rutte I liekent zjus neet aan 'n mierderheid in de Ierste Kamer te kómme.
• Belsj en Luxemburg: Keuning Albèr II beneump Wouter Beke (CD&V) tot óngerhanjelaer.

1 miert

• Belsj en Luxemburg: Informateur Didier Reynders (MR) beejt zie versjlaag aan de Belzje keuning aan. Hae haet zoe good wie gein veuroetgank gebook.
• Duutslandj: Federaal minister Karl-Theodor zu Guttenberg (CSU) nump óntsjlaag nao sjendale euver weitesjappelik plagiaat.

februari

28 februari

• Kuns en cultuur: De Amerikaanse actries Jane Russell sjtörf op 89-jäörige laeftied.

27 februari

• Nederlands Limburg: Beej 'ne brank in Kessel kómme 200 deure um.

26 februari

• Afrika: De Veiligheidsraod van de VN lèk 't Libisch bewèndj wiedgaonde sancties op, wo-ónger aangifte bie d'n Internationale Sjtraafhaof, e verbod op wapehanjel, e reisverbod en bevrering van de tegeuj.

25 februari

• Groet-Brittannië en Ierlandj: in Ierlandj waere vervreugde verkezinge gehauwe. Ze waore door de regering oetgesjreve nao haevige kritiek op de economische crisis en de bezuniginge.

24 februari

• Afrika: De Algerijnse regering van Abdelaziz Boeteflika huf de noedtoesjtandj nao 19 jaor op. 't Èndj aan de noedtoesjtandj, dae de regering dictatoriaal mach gaaf, waor ein van de eise van de demonstrerende oppositie.

22 februari

• Nui Zieland: 'n Eerdbeving mèt 'n magnitude van 6,3 tröf Christchurch, zeker 65 lui vinde d'n doed.
• Nederlandj: In 't havegebeed van Amsterdam brèk 'ne brandj oet op e chemisch terrein. De wolk wejt van de sjtad aaf nao 't Kennemerlandj (d.i. Haarlem en ómgaeving)/

17 februari

• Belsj: In Gent weurt e ludiek volksfies opgezat; me gedènk dat 't Belsj 't waereldrecord lank regeringsvörme in henj krieg.

15 februari

• Afrika: In naovolging van veural naoberlenj Tunesië en Egypte begènne ouch in Libië proteste, hie taege Moe'ammar al-Kaddhafi, dae al saer 1969 aan de mach is. In de volgende daag reageert 't rezjiem mit extreem geweld.
• Nederlands Limburg: In Belvend weurt 'ne doeëje gevónge, dae volges de politie vermaord is.

14 februari

• Kuns en cultuur: De Brits-Amerikaanse jazzpianis George Shearing sjtörf op 91-jäörige laeftied.

12 februari

• Sjport: De Nederlandse ex-fietserenner Fedor den Hertog sjtörf op 64-jäörige laeftied.

11 februari

• Afrika: Hosni Moebarak, saer 1981 dictator van Egypte, trejt aaf en liet de mach aan 't laeger.

10 februari

• Afrika: Hosni Moebarak kunjig op de tv aan de mach veur e deil te zalle euverdrage aan vice-presidentj Soeleimani, meh wel tot september aan te blieve. Dit wèk de weuj op van de demonstrante; ouch de internationaal gemeinsjap vèntj 't neet genóg.

8 februari

• Politiek: Vlaams model en politica Marie-Rose Morel (Vlaams Belang) sjtörf op 38-jäörige laeftied aan kanker.

6 februari

• Kuns en cultuur: Rockgitaris Gary Moore störf op 58-jaorege leeftied.

2 februari

• Midde-Oeste: Nao massaal proteste ouch in Jeme kunjig presidentj Ali Saleh aan zich neet herkeesbaar te sjtille en de mach neet aan ziene zaon euver te drage.

1 februari

• Afrika: De Egyptische oppositie röp 'ne 'mieljoenemarsj' oet, boebij ze e mieljoen lui in de straote vaan Caïro en Alexandrië wèlt kriege. Moebarak kundeg dezelfden daag aon ziech in september neet herkeesbaar te zalle stèlle.
• Midde-Oeste: Keuning Abdoellah II van Jordanië óntsjleit zien regering nao daag van sjtraotproteste.

januari

29 januari

• Afrika (deils 28 januari): Nao de haevigsten dag van proteste saer de ónrös begós óntsjleit d'n Egyptische president Moebarak zien regering. De demonsjtrante blieve aevel 't opsjtappe van Moebarak zelf eise.
• Sjport: Tennissjpäölster Kim Clijsters versjleit de Chinese Li Na wèntj veur 't iers in häör carrièr de Australian Open.
• Kuns en cultuur: D'n Amerikaansen avant-gardecomponis Milton Babbitt sjtörf op 94-jäörige laeftied.

27 januari

• Nederlandj: 'n Kamermierderheid van CDA, VVD, GroenLinks, D66, ChristenUnie en SGP sjtump veur 'n poliesmissie nao Kunduz, Afghanistan, naodat de regering häör planne haet aangepas aan bezjwaore van de oppositie.

26 januari

• Belsj en Luxemburg: Johan Vande Lanotte beit obbenuujs zien óntsjlaag aan, noe besjpraekinge mit drei ouch neet zeen gelök. De keuning accepteert dit ónmiddellik.
• Nederlands Limburg: De gemeinte Mestreech sjelt de liening aon MVV kwiet, ouch al kós de club neet gans aon häör veurweerdes voldoen.
• Sjport: Justine Henin sjtop (obbenuujs) mit tennisse.
• Sjport: De Sjpaanse fietserenbóndj lèk Alberto Contador ei jaor sjorsing op óm 't gebroek van clenbuterol. Dit zèt häöm oet zien euverwinning in de Runj van Frankriek in 2010.

25 januari

• Afrika: In Egypte begènne volksopsjtenj nao 't veurbeeld van Tunesië, mit as doel 't bewèndj van presidentj Hosni Moebarak óm te goeje.

24 januari

• Ruslandj: Op de Domodedovolochhave in Moskou vèntj 'n zelfmaorsaansjlaag plaats. Hiebij valle zeker 35 doeje en mier as hóngerd gewónje.

23 januari

• Belsj: In Brussel protestere 34.000 luuj veur 't sjnel vörme van 'n regering. De formatie doort noe al mier as 200 daag.

21 januari

• Belsj Limburg: In Lommel weurt 'n 23-jäörige vrouw van Bulgaarse aafkóms vermaord.
• Nederlandj: In Den Haag protestere sjtudente en porfessore taege kabinètsplanne veur hoeg boetes biej oetloupende sjtudies.

18 januari

• Midde-Amerika: Ex-dictator Jean-Claude Duvalier van Haïti, baeter bekèndj as Baby Doc, weurt kort nao zien aankóms in 't landj aangehauwe veur verhuur.
• Belsj en Luxemburg: De criteria veur naturalisatie waere versjerp. Dat beteikent tot de 'snel-Belsj-wèt' verdwient.

15 januari

• Frankriek: Jean-Marie Le Pen sjtap nao 38 jaor trök es leisman van 't extreem-rechs Front National; zien dochter Marine Le Pen, weurt as opvolgster gekoze.

14 januari

• Afrika: Nao waeke van proteste deit president Zine al-Abidine Ben-Ali van Tunesië aafsjtand van de regering, wonao hae 't landj óntvlöch. Premier Mohamed Ghannouchi nump woer.
• Sjport: De Nederlandse fietserenner en latere ploogleier Peter Post sjtörf op 77-jäörige laeftied.

13 januari

• Economie De Nederlandse óngernummer Albert Heijn jr. sjtörf op 83-jäörige laeftied.

12 januari

• Oceanië: 't Australisch hoegwater bereik Brisbane, hoofsjtad van Queensland. De niveaus van de euversjtruiming in 1974 waere neet gehaold.

11 januari

• Belsj en Luxemburg: Keuning Albèr II van 't Belsj weigert 't óntsjlaag van bemiddelaer Johan Vande Lanotte en belas Bart De Wever (N-VA) en Elio Di Rupo (PS) as assistente biej 't (her)sjrieve van 'n bemiddelingsnota.
• Belsj Limburg: 'ne Man zaet in zien jäög te zeen misbroek door zösters in Sint-Vincentiusinternaat in Zelem (Haole). De volgenden dag kómme mie verhaole euver missjtenj (neet allein seksueel) nao boete.

10 januari

• Belsj en Luxemburg: De regering-Leterme II, nog ummertouw demissionair es de vörming vaan 'n nui regering neet avveceert, krijg vaan de keuning de taak um 'n nui begroeting op te stèlle. Normaal gezeen vèlt dit op 't Belsj boete de beveugheid vaan 'n demissionair regering.
• Zuud-Europa: De Baskische terreurbeweging ETA kundeg e permanint staak-'t-vure aon.
• Weitesjap: Astronome oet 't Kepler-projek oontdèkke veur 't iers 'n rotsechtege planeet, Kepler-10b mèt 1,4 eerdgroetdes de kleinste exoplaneet oets gevoonde.

9 januari

• Afrika: De bevolking van Zuud-Soedan sjtump in e referendum, wat 'n waek zal doere, euver aafsjeiing van Soedan.
• Sjport: Veldriejer Niels Albert weurt Belsj kampión en versjleit daomit väölvoudig winner Sven Nys, dae opgief.

8 januari

• Belsj en Luxemburg: Preester-politicus Luc Versteylen, de sjtichter van Agalev, weurt besjöljig van seksueel misbroek.
• Vereinigde Sjtaote: De Democratische aafgevaerdigde Gabrielle Giffords weurt in Tucson, Arizona, naergesjote. D'n daojer weurt gearresteerd; of 't 'n politieke maord betröf is nog neet dudelek.

7 januari

• Belsj en Luxemburg: Wallonië haet door haevige raege en sjmeltende sjnie groete watereuverlas. Daobie valle zeker vief doeje. Ouch in de Limburge en wiejer sjtroumaafwaarts weurt euverlas verwach.

5 januari

• Nederlandj, Natuur en milieu: Bie Moerdijk (provincie Noord-Braobant) weujt 'ne groete brandj in e chemisch bedrief. De gifwolk bedreig de wiej ómgaeving, in 't bezónjer Dordrech (Zuud-Hollandj).

4 januari

• Sjport: Coen Moulijn, sjtervootballer van Feyenoord in de jaore zestig en begin jaore zevetig, sjtörf op 73-jäörige laeftied aan e herse-infark.

3 januari

• Belsj en Luxemburg: Keuninklik bemiddelaer Johan Vande Lanotte (sp.a) presenteert zie compromisveursjtèl euver ó.a. 'n nuuj financeringswèt. D'n dag denao laek 't oet.

1 januari

• Nederlandj: De Nederlands-Limburgse gemeintes Èèsjde en Mergraote gaon same tot Èèsjde-Mergraote. Ouch in de provincies Frieslandj, Naord- en Zuud-Hollandj, Utrei en Noord-Braobantj vènje fusies plaats. 'n Aantal geplande gaon neet door, wo-ónger die tösje Mook en Middelar, Gennep en Baerge.
• Europa algemein, Economie: Eslandj veurt d'n euro in.
• Midde-Amerika: Op Bonaire, Sint-Eustatius en Saba geit me mit d'n Amerikaansen dollar betaole.
• Afrika: Bie 'n Koptische kirk in Alexandrië, Egypte valle in 'n zelfmaordaansjlaag 21 doeje. D'n daoder weurt in extreem-islamistischen hook gezoch.

Brón

• Dees pagina is in zie gehieël euvergenómme vanne Limburgse Wikipedia. Mit name dank aan gebroeker Steinbach.