Hel sjtieging nuuj coronabesjmettinge in Limburg hèlt aan
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
- Dit artikel sjteit gesjreve in 't AGL.
't Aantal Limburgers det besjmet bliek mit 't nuuj coronavirus is ouch de aafgeloupe zeve daag weer hel opgeloupe, wiewaal get minder hel. De bei Limburgse GGD's tèlde van veurige waek bis aafgeloupe zóndig 2029 positief tests. 'n Waek ierder noom det aantal nog toe van 701 nao 1441.
Ónverangerd blief 't beeld det 't virus in Noord-Limburg mie luuj tröf es in 't zude vanne provincie: 1256 versus 773 in de geneumde zeve daag. Opnuuj kome de veurige waek mie luuj nao de tessjtraote en opnuuj sjteeg 't infectiepercentaasj. In Venlo ligk det noe op bekans 14 procent. Det beteikent det ein op de zeve luuj die krank zeen én zich dao haet gemèld inderdaad besjmet bliek. Bie de drie teslocaties in Zuud-Limburg (Landjgraaf, Wermond en Mesjtreech) sjteeg 't percentaasj van bekans 7 procent angerhaove waek geleje nao noe gemiddeld 8,1.
"De gemiddelde weure verteikend door lieger ciefers begin veurige waek", zaet Christian Hoebe, huid infectiekrenkdes bie de GGD Zuud-Limburg. "Kieks-te nao 't aantal positief tests dit weekend, dan zuus-te veural in Noord-Limburg 'n hel sjtieging: bekans 500 besjmettinge in twie daag tied. V'r doon 't, vergeleke mit de res van 't landj aevel nog ummer vrie good, mer ouch bie ós weure de getalle groeter. V'r koerse noe richting 'n infectiepercentaasj van 10 procent." 't RIVM mèldde gisteraovend in gans Limburg veur daen daag 322 nuuj besjmettinge, 92 in 't zude en 240 in de res vanne provincie.
Wiewaal de toesjtruim nao de tessjtraote greujt, zeen de bei GGD's d'rin gesjlaag de wachtiede, die de veurige maond nog rasj oplepe, kórter te kriege. In Venlo kós me de tescapaciteit opsjroeve nao 1400 per daag. In Zuud-Limburg nao 1800. De GGD Limburg Noord bereikde det door aafsjpraoke mit 't lab van bloodbank Sanquin woe ze tests haer bringk, Hoebe zeukde extra labcapaciteit in Duutsjlandj. Zoe kènne de luuj dao doorgaons al d'n anderen daag terech en kump d'n oetsjlaag binne 24 oer, belove de GGD's. Veur mitwirkers in de zörg en lierare inne "veurrankssjtraot" geit 't nog sjneller: wae zich sjmörges mèld, huurt daezelfden daag d'n oetsjlaag.
Ouch 't aantal coronapatiënte in de Limburgse krankehoezer blief gesjtaag sjtiege. Noe gief 't dao 92 patiënte en det is väöl mie es de waek daoveur (57). De meiste weure verpleeg in 't MUMC (30), gevolg door Zuyderland (27), VieCuri (19), Laurentius (11) en 't St. Jansgashoes. 28 coronapatiënte ligke oppe IC. Oet solidariteit mit krankehoezer in veural de Randsjtad, die de sjtruim coronapatiënte al saer begin deze maond heller zien greuje, neme de Limburgse krankehoezer ouch patiënte oet anger provincies op. Wieväöl patiënte det exak zeen, wille ze neet zègke, behauve det 't ederen daag verzeuke gief van 't LCPS.
Landelik meldde 't RIVM gister 8015 nuuj besjmeetinge, get minder es zóndig. Nationaal ligke op dit moment 1783 coronapatiënte in 't krankehoes, van waem 379 oppe IC.
Brónne
[bewirk | brón bewèrke]
Dit artikel besleit aad nuujs en maak deil oet van oos arsjief van nuujsberichte.