Geine sjtroum in november veur twelf Belsj-Limburgse gemeindes

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich



Dit artikel sjteit gesjreve in 't AGL
Tihange

25 september 2018 - Wen nieks verangertj, zölle in november twelf gemeindes in Belsj Limburg drie oer per daag van de sjtroum waere gehaold. Zelfs wen 't neet oetzunjerlik kaud is, zal dan e sjtroumtekort optraeje. Hieveur waarsjoewt 't Fidderaal Planburo, ómdet dan van de zeve kaernreactore mer eine in gebroek zal zeen.

De situatie weurt noe dudelik doordet Engie Electrabel de kaerncentrales van Tihange en Doel langer toehèlt óm de betónrot in de bunkers te hersjtèlle. Electrabel verzekert det vief kaerncentrales aan 't ènj van december weer zölle wèrke.

De Minister van Energie en Laefmiljeu, Marie-Christine Marghem, wilt veurkómme det 't zoewied kump en haet aangekóndig kentak op te zölle numme mit Nederlandj, Duutsjlandj en Frankriek veur te vraoge de beneudigde extra capaciteit te lievere. De verbènjinge óngerling zeen de aafgeloupe jaor sterk verbaeterd, woedoor dit 'n oplossing kan zeen. 'n Anger optie zouw zeen óm de gaascentrale van Vilvoorde her te aktivere. De centrale ligk al e jaor of vief sjtèl, mer maak nog waal deil oet van de strategische rizzerfcapaciteit.

Zouw gein oplossing waere gevónje, dan weurt 't aafsjakelplan van krach gesjtèld. Dit verlöp euver ach sjieve, woebie sjief 8 es ierste weurt oetgesjakeld bie e sjtroumtekort. Dit zouw gebäöre wen de sjtroumvraog 't hoegste is, van vief oer sjmiddigs tot ach oer saoves.

Gemeindes die in sjief 8 ligke zeen: As, Bilze, Bree, Diepenbik, Dilze-Sjtókkem, Hoeselt, Kinder, Mezeik, Mesmechele, Miewe-Rooj, Opglabbik en Euverpelt.


Brónne[bewirk | brón bewèrke]



Dit artikel besleit aad nuujs.