Fossiel genoom tuint hybried van twie oetgesjtorve saorte minsj
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
- Dit artikel sjteit gesjreve in 't AGL
28 augustus 2018 - 'ne Groep weitesjappers haet aangekóndig de euverbliefsele van e minsjechtig maedje van zoeget 50 doezend jaor trök te höbbe gevónje. Det maedje had eine Neanderthaler-elder en einen Denisovan-elder, twie versjeije saorte minsj, die noe allebei zeen oetgesjtorve. 't Rizzeltaat, van e genoomóngerzeuk in Leipzig, van de fossiel knäök oet Siberië, waerde oetgebrach op de veurige waek woonsdig in 't weitesjappelik tiedsjrif Nature. De weitesjappers zagte det 't noe veur d'n ierste kier waas det me e kèndj haet gevónje mit elders van versjèllende minsjsaorte.
Van 't einigste fossiel knaokfragment det 't haet daovan, zoeget twie centimaeter lang, weurt door weitesjappers gezag det 't van e maedje aafkómstig is, det minstes 13 jaor awd waas. 't Fragment waerde in 2012 gevónje in de Denisova-grot in Siberië. De minsjsaorte Denisovan kènt me allein direk vanoet diezelfde grot, wo die saort waerde óntdèk in 2011; de grot is ouch de einigste plaatsj woe zoewaal euverbliefsele van Neanderthalers es Denisovans zeen trökgevónje. Neanderthalers haet me door gans Europa en Azië aangetroffe. Sjpäör van de gene van beij saorte kómme nog veur in modern minsje. Weitesjappers vónje det 't nucleair DNA van dit knaokfragment temmelik aeve waas ónger te verdeile bie de beij saorte, terwiel 't mitochondriaal DNA Neanderthaler-DNA waas; nucleair DNA kump van de beij elders, terwiel mitochondriaal DNA allein van de moder kump. Hiedoor höbbe ze de conclusie getróch det de moder van 't maedje 'ne Neanderthaler waas en de vader 'ne Denisovan.
De weitesjappers höbbe ouch óntdèk det de vader van 't maedje, óndanks det hae 'nen Denisovan waas, ouch sjpäör had van Neanderthaler-DNA, misjien waal van mier es hóngerd generaties ierder. Ze óntdèkde ouch det 't DNA van de moder neet hiel neij verwantj waas aan det van anger Neanderthalers die me in die grot höbbe gevónje. Det wies op mierdere migratietrèkke van Neanderthalers tösje Siberië en Europa.
Brónne[bewirk | brón bewèrke]
- This ancient bone belonged to a child of two extinct human species. Gretchen Vogel - Science (tiedsjrif), 22 augustus 2018
- Cave girl was half Neanderthal, half Denisovan. Helen Briggs - BBC News Online, 22 augustus 2018
- Fossil female's mom was Neanderthal, but dad was Denisovan. Deutsche Welle, 22 augustus 2018
Dit artikel besleit aad nuujs en maak deil oet van oos arsjief van nuujsberichte.