Naar inhoud springen

Europese Kemissie lègk Google bote op van 4,34 miljard

Van Wikinuujs

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich

Dit artikel sjteit gesjreve in 't AGL
't logo van Google

24 juli 2018 - De Europese Kemissie lègk 't megabedrief Google 'n óngekènd hoeg bote op van 4,34 miljard euro. 't Veurneumde bedraag is bevestig gewaore door de EU-kómmesaerin Margrethe Vestager. 't Is de hoegste bote die de Europese Kemissie oets haet opgelag.

De raej veur de bote is machsmisbroek door Google via 't besjturingssysteem Android. De kemissie oerdeilt det Google zich op drie versjèllende menere via Android sjöldig maak aan ónierlike kóngkerensie:

  • Tillefoonfabrikante die op 'n Android-toesjtèl Google Play Store wille insjtallere, waere door Google gedwónge óm de sjtandaardbrowser van Google, Google Chrome, en de zeuk-app van Google te insjtallere, ómdet ze angersj geinen toegank kriege tót Google Store;
  • Tillefoonfabrikante en telecomaanbeijers waerde ierder door Google ómgekoch zoedet ze oetsjletend 't zeukmesjien van Google op nuuj tillefoons zouwe insjtallere;
  • Google maak 't fabrikante ónmeugelik óm tillefoons te verkoupe mit neet-goodgekäörde forks van Android d'rop.

Memènteel driejt 80% van alle mobiel apparate die d'r zeen op Android. Hiejaan mót noe binne 90 daag 'n ènj kómme, angersj weurt de bote nog hoeger.

Google haet al laote weite taenge de bote in beroop te zölle gaon. 't Bedrief veurt es taenge-argumènt aan det Android de oetwaalmeugelikhede graad veur edereine haet oetgebreid, in plaats van bepirk. Google mót óndanks det 't versjöldigde bedraag direk euvermake. 't Bedraag zal op 'n sjpesjaal, geblokkeerde raekening waere gezat. Daonao volg de juridische procedure, die jaore kan doere, tótdet 't Hof van Justitie van de Europese Unie e diffenitief oerdeil zal velle. Weurt de kemissie oetèntelik in 't geliek gesjtèld, dan zal 't geld waere verdeild ónger alle EU-lidsjtaote.

Google waerde veurig jaor ouch al beboot door de Europese Kemissie veur machsmisbroek.


Brónne

[bewirk | brón bewèrke]


Dit artikel besleit aad nuujs en maak deil oet van oos arsjief van nuujsberichte.

Aafkómstig van "https://li.wikinews.org/w/index.php?title=Europese_Kemissie_lègk_Google_bote_op_van_4,34_miljard&oldid=19701"