Europees Parlement wiltj verbód op pulsvèsserie

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


MOFERT - 17 jannewarie 2018 - 't Europees Parlement wiltj e gans verbód oppe pulsvèsserie. 'ne Groeate mieëderheid van 't Europees Parlement stumdje dizdaags daomit in. Ieëre beslote de Europees landjboewministers al det pulsvèsse duchtig wuuertj bepirk. Nederlandjse vèssers vörchten 'ne miljoenestroep ómdet häör buuet al zeen oetgerös gewaore mit gespecialiseerdj vèstuug.

Mit pulsvèsse wuuertj sjol en anger baomvès mit klein lektriksjuukskes vanne baom aaf gelok. Anger vèssers make daoveur gebroek van zwaor kittinge die euvere zieëfloer sleipe. Veure baom is de nuuj techniek baeter aldusse Nederlandjse vèssers en 't kabinèt. Boetedet is de bievangs en 't brandjstofverbroek minder.

Toch is de litsten tied väöl waerstandj taenge pulsvèsserie. Veural in Frankriek zègke de vèssers det ze geine vès mieë taengekómme wen 'ne Nederlandjse boeat haet euvergevare. De zieë zów verangeren in 'n weusdje. Versjillige Franse vèssers zègke dore nuuj techniek te min te vange veur häör kotters inne vaart te haje.

Dore kraf vanne Franse lobby en 't feit det pulsvèsserie allein op groeate sjaol plaatsvindj in Nederlandj hele de vèssers al lenger raekening d'rmit det de stumming slech zów oetpakke veur häör. Toch vèltj dees oetkóms taenge. Oetèntelik stumdje 399 Europarlementaere veur e verbód en 189 taenge.

't Besloet van 't Europees Parlement is 'nen duchtige slaag veure vèssers die de aafgeloupe jaore miljoenen aan euro's höbben investeerdj veure sjeper aan te passe. Ze stèlle det gei bewies is det pulsvèsserie sjajeliker is es kittingvèsserie.

De Europees Kemisje haet zich oetgespraoke véúren toestandj van pulsvèsserie, ouch door gebraek aan weitensjappelike óngerboewing van meugelik sjajelike naeveneffèkte. 't Parlement geit rech daotaengenin.

De parlementaeren höbbe zich laoten euvertuge door taengestenjers van pulsvèsserie die bewaere det de techniek rampzieëlig is veur al 't laeven inne zieë. Vèssers zówwe doeaj vèssen in häör nètte vinjen en zelfs plankton zów neet bestandj zeen taenge de techniek. In 't parlement góng e plaetje róndj van 'ne vès mit 'ne blitssjiech door 'm haer.



Dit artikel besleit aad nuujs.