Doeven in Haerle kriegen anticonceptievoor

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


MOFERT - 3 mieërt 2021 - De gemèndje Haerle geit de doeve dao inne stad 'n anticonceptiemillesien toedene door 't voor. Ieëre waas dore gemèndje al e voorverbód ingestèldj taenge de doeve veure euverlas vanne doevebevölking te vermindere. Veur deervruntjelike menere te zeuken haet m'n euverlag gedaon mit Tóngere, wo 'tzelvendje perbleem zich haet veurgedaon. Dao-oet kwaam de keus veur 't anticonceptievoor, det op veer voorplaatse gegange zal waeren ane doeve.

De aanpak haet in Tóngere daoveur gezörg det 't aantal doeven in e deil jaor tied mit twieëderdje verminderdj is. Dao höbbe zie 't gans gedaon ónger toezich van vieëdokters; det zal ouch in Haerle gebeure wen det coronaveilig kan gebeure.

De euverlas vanne doeve zitj veur e good deil inne sjiet. Eder doef sjietj zoea 14 kilo de jaor oet, waat neet allein misselik is op stuup en benkskes, mer ouch 't zoer inne sjiet is e perbleem. Det tas namelik geboewen aan die me daorop mót zuvermaken en rinnevere. Wiejer verstaeke doeven häör èster in raengepiepe, gäöte, aafveure, sjouwen en nag waal in airco's. Ouch kónne doeve gekrenkdjes euverbringe.

Me wètj nanneet waat 't ieëre ingestèldj voorverbód veur effek gadj haet. Doordet 't dore corona minder drök is inne stad wuuert ouch väöl minder aafval naogelaote, waat de doeve vrote. Vashajendje doevevoorders zólle waal van noe aaf bekeurd waere wen zie trappeerd waere.

Dao is al väöl kritiek, mit naam vanoete Pertie vanne Dere. Zie vinje det baeter 't óngerligkendj perbleem, 't zwerfaafval, aangepak kan waere. Dit zörg veur minder voor veurhenj veure bieëster, waat door netuurlike seleksje lèdj toet minder doeve. Wiejer haet 't kritiek op 't middel waat gebroek wuuert, nicarbazien. Det middel wuuert gemeinelik ingezatj bie veugel die get ane derm höbbe. Es biewirking geldj det de eier neet oetkómme, meh de Pertie vanne Dere kan zich neet veurstèlle det det de insigste biewirking is.

Brónne[bewirk | brón bewèrke]



Dit artikel besleit nuujs det zich recèntjelik haet aafgespeeldj.