Doejetal coronavirus sjtieg in Limburg nao zeker 411
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
- Dit artikel sjteit gesjreve in 't AGL.
't Aantal doeje door 't coronavirus in Noord- en Midde-Limburg is de aafgeloupe 24 oer gesjtege nao 215, zoe meldt de GGD. Det zien nege mier es zaoterdig. 't Totaal aantal doeje inne pervincie is daomèt op minimaal 411 gekómme. De nuuj sjtörfgevalle in Zuud-Limburg zien daorin neet mètgenómme.
De GGD Zuud-Limburg guuef op Paoszóndig geinen update.
't Aantal nuuj krankehoesopnames inne pervincie is volges de RIVM-ciefers mèt 26 gesjtege, 12 in Noord- en Midde-Limburg, 14 in 't zuje. In totaal zien de aafgeloupe weke 1261 besjmette patiënte opgenómme. Veur alle dudelikheid: det wilt neet zègke det die op dit moment nog in 't krankehoes ligke.
Lenjelik gezeen kump 't aantal luuj det de aafgeloupe 24 oer door 't virus is gehiemeld oet op 94. 't Is veur 't iers in twelf daag det minder es hónderd luuj zien gesjtorve. Zaoterdig goof 't nog 132 gehiemelde.
Oete lètste ciefers van 't RIVM bliek det 't totaal aantal coronadoeje in Nederlandj oetkump op 2737. 196 nuuj luuj kwame in 't krankehoes. In totaal zien noe mier es 8528 luuj opgenómme (gewaes).
Det 't aantal doeje zoe lieg ligk is 'ne nuje mielpaol, woebie aevel 'n kantteikening mót weure gemaak; de registraties weure in 't weekend minder good biegehaje. Det gebeurt soms pas nao 't weekend. De aafgeloupe weke waore daodoor opvallende pieke truuk te zeen inne sjtörfdeciefers en det zouw noe ouch 't geval kènne zien.
't Aantal nuuj krankehoesopnames sjoegkelt noe al daag róndj de twiehónderd. Zaoterdig waor det veur 't iers ónger de twiehónderd, huuj gief 't dus get mier.
Aafgeloupe week kwam 't aantal nuuj krankehoesopnames einen kier baove de driehónderd oet. Veural in Braobant is de daling good te zeen. Zaoterdig móste dao tachetig luuj weure opgenómme, 't liegste aantal saer 15 miert. Ouch 't aantal luuj oppe IC nump in dees pervincie aaf.
Det COVID-19 zich minder rasj versjpreid, kump volges 't RIVM door de sjtreng maotregele die saer 15 miert zien genómme. In totaal zien noe 25.587 luuj besjmet (gewaes) mèt corona. De aafgeloupe 24 oer kwame dao 1174 nuuj geregistreerde besjmetting bie. Ouch dees ciefers kènne euveriges e verteikend beeld gaeve vanne werkelikheid, ómdet innen tössetied meugelik patiënte zien opgenómme die hiel waarsjienlik waal corona höbbe, maar bie waem dit nog neet officieel is vasgesjteld.
Dinsdig 24 miert blief de piekdaag wat betröf de krankehoesopnames. Doe woorte 556 luuj mèt ernstige klachte binne gebrach. Op 2 april zien de meiste sjtörfgevalle geregistreerd gewaore (156).
Brónne
[bewirk | brón bewèrke]- Actuele informatie over het nieuwe coronavirus (COVID-19). RIVM: actueel infermasie euver 't nuuj coronavirus, wiezigingsdatum 12 april 2020, 14.01
- Dodental door coronavirus stijgt in Limburg naar zeker 411. Raymond Boere e.a., Dagblad De Limburger, 12 april 2020
Dit artikel besleit aad nuujs en maak deil oet van oos arsjief van nuujsberichte.