Doeje en teentalle gewónje nao zjwaoren aerdsjóddel Egeïsche Zie tösse Grekelandj en Törkieje

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Kaertje mit aerdsjóddels inne Egeïsche regio (30 oktoeber 2020)
Dit artikel sjteit gesjreve in 't AGL.

Inne Egeïsche Zie tösse Törkieje en Grekelandj haet zich vriedigmiddig 'ne zjwaoren aerdsjóddel veurgedaon. In totaal zeen 26 luuj doedgebleve en mie es achhónderd luuj gewóndj geraak. De meiste sjlachoffers vele inne sjtad Izmir. Op 't Greekse eilandj Samos eisde de aerdsjóddel twie laeves en raakde minstes negeteen luuj gewóndj.

In Izmir zeen zeker veer geboewe gans verweus gewaore. Zeker teen daovan sjtortde inein en 'n rits aan anger geboewe raakde besjaedig. Reddingswirkers zeuke tösse 't puun nao euverlaevende en kóste al zevetig luuj te bevrieje. Volges de börgemeister van Izmir vele inne sjtad zeker twintig geboewe inein. In 't distrik Seferihisar inne pervincie Izmir veroerzaakde 'ne kleinen tsunami euversjtruiminge.

Op 't Greekse eilandj Samos zeen twee teners doedgebleve wie ze ónger 'n insjtortende moer terechkome, aldusse hölpdeenste. 't Kössjtedje Vathy woort euversjpeuld door 'ne kleinen tsunami. Greekse tilleviessjtasies tuinde de euversjtruimde köspromenade, woe 't ziewater auto's ewegsjpeulde. De Greekse börgerbesjerming deilde de eilandjbewoeners in e sms'ke mit det zie inne aope lóch en oete buurt van geboewe mótte blieve.

Volges de Törkse Autoriteit veur Rampe- en Noedhölpdeenste vónde de aerdsjóddels róndj 12.50 oer (Nederlandsen tied) plaats op 'n deepde van 16,5 kilometer. D'n aerdsjóddel had 'n krach van 6,6 oppe sjaal van Richter. 't Epicentrum loog inne Egeïsche Zie veur Izmir en ten noorde van 't Greekse eilandj Samos. Volges de AFAD woorte nao d'n aerdsjóddel nog negeteen naosjókke gemete. Ze waore bis inne Greekse huidsjtad en op 't eilandj Kreta te veule. 't Amerikaanse seismologisch insjtituut USGS sjprik zelfs van 'n krach van 7,0.

Törkieje en Grekelandj höbbe zich óngerein hölp aangebaoje en premier Rutte deeg det ouch names Nederlandj.


Brónne[bewirk | brón bewèrke]

Dit artikel is de ingekórte versie van 't artikel van De Limburger:

Aanvöllinge kómme oet dit artikel:



Dit artikel besleit aad nuujs.