Doeje bie gevechte oppe grens van Kirgizië en Tadzjikistan
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
- Dit artikel sjteit gesjreve in 't AGL.
Bie gevechte oppe grens tösje de Centraal-Aziatische lenj Kirgizië en Tadzjikistan zint mie es 90 doeje gevalle en hónderde luuj gewóndj geraak. Wiejer zint 136.000 luuj oppe vlöch gesjlage. Bei lenj besjöldige zich óngerein van provokaties. De oerzaak van 't geweld is aevel óndutelik en aanvankelik waore alle poginge veur tot e sjtaak-'t-vure te kómme mislök.
't Conflik óntsjtóng aafgeloupe goonsdig, wie 'ne Tadzjiekse grenswach óm 't laeve koom bie 'n sjeetpartie. Vriedig escaleerde 't conflik wiejer. Doe goof 't zjwaor artilleriegevechte en woort 't vleegveld vanne Kirgizische sjtad Batken besjtook. Tadzjiekse troepe zouwe ouch e Kirgizisch dörpke höbbe ingenómme.
De gevechte vinje plaats inne Kirgizischen oblas Batken, óngerdeil vanne Fergana-vallei. Det is 'ne politiek insjtabiele regio. Nao de val vanne Sovjet-Unie en de ónaafhenkelikheid van bei lenj in 1991 goof 't dökker gevechte. Oerzaak waor meistal opkómmend islamitisch terrorisme. Veural 't oeste van Tadzjikistan bleek e breujnes te zeen van jihadiste oet Afghanistan en det geweldj versjpreidde zich róndj de millenniumwisseling via de Fergana-vallei nao 't noorde. Boetedet verloupe de grenze plaatselik zier grillig, dewiel versjillende etnische grope binne en boete de grenze vanne natiesjtate woene. In 2021 goof e waterreservoir aanleijing tot sjpanninge tösje Kirgieze en Tadzjieke, woebie teentalle luuj waore doedgebleve en mie es 40.000 luuj móste vlöchte.
Op 20 september höbbe bei lenj e akkoord geslaote euver e sjtaak-'t-vure.
Brónne
[bewirk | brón bewèrke]- Kyrgyz-Tajik border conflict death toll nearly 100. Reuters, 18 september 2022
- Meer dan 90 doden bij geweld aan grens tussen Tadzjikistan en Kirgizië. Het Nieuwsblad, 18 september 2022
- Tajikistan and Kyrgyzstan sign peace deal after deadly border clashes Access to the comments. Louis Miner & Czrfel Anadolu, Euronews - 20 september 2022
Dit artikel besleit aad nuujs en maak deil oet van oos arsjief van nuujsberichte.