Dit zien alle nuuj coronamaotregele

Van Wikinuujs

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Dit artikel sjteit gesjreve in 't AGL.

Sjtrenger maotregele zien nuuedig veur 't coronavirus ónger controle te kriege. Det haet premier Mark Rutte maondigaovend gezag tiedes 'n sjpeciaal persconferentie. V'r zette alle nuuj regels die de anger drie waeke gelde op 'n rie:
- Horeca in 't ganse landj mót óm 22.00 oer toe, vanaaf 21.00 oer maag nemes mie nao binne.

- Inne horeca is 't verplich bezeukers te vraoge zich te registrere, zoedet de GGD effectief brón- en kontakóngerzeuk kan doon. Bie binneruumdes mit 'nen doorsjtroum van bezeukers zoewie in mónnemente, bibliotheke en musea, maar mit oetzóndering vannen detailhandel en de merte, vintj bezeuk plaats op basis van reservering.

- 't Kabinet advisiert klante veur in winkels in Amsterdam, Rotterdam en Den Haag móndjkepkes te drage. Premier Mark Rutte zag det 't drage van móndjkepkes gein verplichting is, maar det winkeliers waal klante mage weigere die gein móndjkepke wille drage.

- Bie alle wedsjtrieje in 't betaalde vootbal zit vanaaf dinsdig 18.00 oer minimaal drie waeke lank gein publiek mie oppe tribune. Ouch bie anger sjportwedsjtrieje zien veurluipig gein supporters wilkóm. Ouch amateurs en jäög mótte häör wedsjtrieje minimaal drie waeke achter gesjlote deure aafwirke. Ouch sjportkantines gaon toe.

- Ouch weurt heimwirke weer de norm, maar allein wienie 't neet angers kan. Heimwirke geit sjtrenger weure gehandjhaaf. Wirkgaevers die toch luuj nao kentoer haole, kinne weure aangesjproke, of zelfs veerteen daag op sjlot weure gedaon wienie bliek det ze 'n brandjhaerd zien.

- Inne supermerte weure winkelkerkes verplich. Ouch kómme twie kier per daag sjpeciaal tiedsjtippe veur ajer en kwetsbaar luuj veur te kinne winkele.

- Veur alle zoegeneumde kontakberope kump 'n registratieplich. Bieveurbeeld kappers mótte dus, zjuus wie de horeca, aan häör klante vraoge veur kontakgegaeves achter te laote.

- Bezeuk thoes weurt maximaal drie luuj (kinger bis 13 jaor valle hie neet ónger, aevenes 't eige hoeshaje).

- In anger geboewe wie de eige woening maag me mit maximaal veer luuj samekómme. Det beteikent det veur ein hoeshaje óf maximaal veer luuj, kinger neet mitgeraekend, 'n reservering bie 'n bioscoop of restaurant kan weure gemaak.

- In publieke ruumdes mage maximaal dertig persoene, naeve personeel, aanwaezig zien. Boete zien groepe van maximaal veertig luuj toegesjtange. Oetzónderinge zien ónger mie demonstraties, groete pretparke, musea, sjoele en begreffenisse.

Brónne[bewirk | brón bewèrke]



Dit artikel besleit aad nuujs en maak deil oet van oos arsjief van nuujsberichte.