Coronavirus: 712 Limburgers teste positief, 60 gehiemeld

Van Wikinuujs
Naar navigatie springen Naar zoeken springen

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Dit artikel sjteit gesjreve in 't AGL.

't Aantal Limburgers det positief is getes op 'n coronabesjmetting is ouch 't aafgeloupe etmaal weer wiejer gegreujd. 't Zien noe 712, bao hónderd mie es maondig. Ouch 't aantal gehiemelde luuj is gesjtege: van 48 nao zèstig. Det bliek oeten dageliksen update van de bei Limburgse GGD's.

Ónderverdeild nao regio tèlt Noord-Limburg noe 293 bevestigde besjmettinge en Zuud-Limburg 419. De GGD Zuud-Limburg registreerde bis noe 34 sjtörfgevalle door corona, de collega's in Noord-Limburg 26.

Es v'r nao 't aantal besjmettinge per gemeinte kieke, dan velt veural Mesjtreech op. Dao sjteeg 't aantal positief getesde kranke in ein etmaal mèt 34 bis noe 94 bevestigde kranke. In Sjtein greujde 't aantal patiënte in einen daag van 9 nao 24. Nao Mesjtreech tèlt Zitterd-Gelaen mèt 84 positief teste de meiste coronabesjmettinge. Opvallend is ten sjlotte de gemeinte Vols. Die bleef bis gister vrie van vasgesjtelde corona-kranke, huuj doeke dao de ierste drie patiënte op

Landelik sjteeg 't aantal positief getesde coronapatiënte mèt 811 nao in totaal 5.560. 't Aantal doeje sjteeg mèt 63 nao 276, aldusse d'n update van 't RIVM. Daomèt liek Limburg rilletief euververtaegewoordig went 't geit óm 't aantal gehiemelde. 'n Direkte oerzaak is neet aan te wieze, maar de vergriezing kin 'n rol sjpeule. De laeftied vanne gehiemelde ligk landelik tösse de 55 en 97 jaor.

De meiste positief getesde luuj woene inne pervincie Noord-Braobant, namelik 1739 persoene. Daonao zien de meiste positief getesde luuj gemeld in Zuud-Hollandj (758) en Noord-Hollandj.

't RIVM benaodrök det 't werkelike aantal besjmettinge mèt 't nuuj coronavirus hoeger ligk es de geneumde aantalle. Dit kump ómdet neet edereine mèt 'n meugelike besjmetting getes weurt, maar veural patiënte die zoe krank zien det ze in 't krankehoes opgenome weure en zörgverlieëners.

Ouch kump 't RIVM mèt 'nen disclaimer euver versjille in 't aantal gemelde kranke en gehiemelde patiënte. "Det kin daomèt te make höbbe det gehiemelde patieënte neet ömmer op dezelfden daag gemeld weure. Det de aantalle per daag sjogkele, zègk nog neets euver 't effek vanne maatregele die saer haaf miert zien ingesjteld gewaore", alddusse 't insjtituut. Nao verwachting zal det effek pas dees week of begin volgende week te zeen zien.

Brónne[bewirk | brón bewèrke]



Dit artikel besleit aad nuujs.