Coronadrökde in Limburgse krankehoezer nump wiejer aaf
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
De coronadrökde inne Limburgse krankehoezer is de aafgeloupe daag rasj wiejer aafgenómme. Ouch mit 't aantal nuuj infeksies geit 't sjteeds mie de goje kantj op. Toch klink de waarsjuwing det de pandemie nog neet veurbie is. Van Venlo bis Mesjtreech loge dinsdigmiddig 143 coronapatiënte in 't krankehoes. Dat zeen 58 minder es veurige waek maondig. Vanne 143 Covid-patiënte ligke 45 oppe ic en det zeen teen minder es veurige waek. Zuyderland in Haelder tèlt nog ömmer de meiste patiënte (65), 't St. Jansgashoes in Wiert 't mins (5).
Daomit zet de daling, woevan in waek 19 veurzichtig 't begin waor te zeen, serieus door. Det bliek veural oet 't aantal nuuj opgenómme patiënte. Loog det aantal drie weke truuk nog op 238 en in waek 19 op 177, tösje 17 en 23 mei bleef 't bepèrk bis 114.
Reageerde de krankehoezer veurige waek nog veurzichtig oppe 'aafvlakking', noe sjpraeke ze van 'n 'houpvolle daling'. "Mer v'r blieve alert", benaodrök 'ne VieCuri-waordveurster. „Dit waekènj nog waor ineins toch weer 'n piek qua corona-verdachte patiënte oppe sjpoedeisende hölp.” Ouch Zuyderlandtopman David Jongen guntj zeen personeel de aompauze, mer waarsjuwt. "Ich preuf 'n hoerasjtömming in 't landj van ' 't is veurbie'. Det is dus neet zoe. Jao, 't weurt minder drök, mer v'r höbbe ouch de aafgeloupe daag weer 58 nuuj patiënte opgenómme."
De GGD’s tèlde tösje 17 en 23 mei 2178 mèldinge van nuuj besjmettinge. Det zeen 984 minder (31 procent) es 'n waek ierder, wie ouch al kal waor van 'n daling van 21 procent. De daling waor afgeloupe daag opnuuj het groetst in Zuud-Limburg (van 1508 nao 1004 infeksies). In Noord- en Midde-Limburg zakde 't aantal mèldinge van 1654 nao 1174. Mit 't ciefer van 2178 infeksies zitte v'r qua aantalle op 't niveau van begin miert, vlak veur d'n daarde coronagolf.
Qua dichheid vanne pandemie zit Limburg op 195 besjmettinge per 100.000 inwoeners. Det is get baoven 't lenjelik gemiddelde van 161. De versjille zien groet. Groninge scoort 103 en de regio Twente 235. Naord-Limburg zit dao mit 226 euveriges neet wied ónger. Lenjelik én in Limburg sjteit 't reproductiegetal R op 0,86. Det beteikent det de pandemie zich neet mie oetbreidt. 't Aantal besjmette Limburgers weurt gesjat op 8500. Veurige waek waor det nog 10.000. De GGD's tèlde aafgeloupe waek 11 coronasjtörfdes, woevan 7 in 't zuje.
Oetgesjplits nao laeftied vèlt op det 't groetste aantal nuuj infeksies (38 procent) weurt gemèld inne groep 10 bis 29-jäörige. Ónger 60-plussers weurtt effek van vaccinatie sjteeds duteliker: häör aandeil in 't totaal aantal gemèlde besjmettinge daalde veurige waek van 23 nao 15 procent.
De Limburgse GGD’s, die de meiste inentinge veur häör raekening numme, höbbe bis huuj 474.000 prikke gezat. Driekwart daovan betröf 'n ierste prik. Lenjelik sjteit d'n tèller op ruum 8,5 miljoen vaccinaties. De vraog nao tests inne GGD-sjtraote noom veurige waek wiejer aaf. De GGD’s zeen dao 'n verbandj mit 't toenummend aantal luuj det kees veur 'nen thoestes.
Brónne[bewirk | brón bewèrke]
Dit artikel besleit aad nuujs en maak deil oet van oos arsjief van nuujsberichte.