Amerikaan vermaord door Sentinel-eilenjers
Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich
- Dit artikel sjteit gesjreve in 't AGL
22 november 2018 - D'n aafgeloupe daesdig höbbe twie vèsjers 't lief gezeen van de 27-jäörigen Amerikaan John Allen Chau. Hae loog doed op 't sjtrandj van 't Naord-Sentineleilandj in d'n Indischen Oceaan. Chau waas daohaer gegange, in euvertraejing van de Indische wèt, óm de Sentinelese sjtam te bezeuke. Deze sjtam haet 'n gesjiedenis van viejendigheid taenge boetesjtäönders.
De vèsjers zoge de sjtamlede e touw róndj de nak van Chau bènje en det zie ouch zien lief ewegsleipde. Ze wore engstig en vlöchde.
D'n dirrektäör-ginneraal van de pelissie van de Andaman- en Nicobareilenj, Dependra Pathak, vertèlde det Chau nao 't eilandj waas gegange óm de luuj dao tót 't Christendóm te bekiere. Chau is nao India gegange mit e toeristevisum. Op 15 november huurde hae vèsjers in die 'm 't wiedste sjtök op waeg nao 't Naord-Sentineleilandj vore, zon 1.370 km t'n oeste van 't vastelandj van India; 't lètste sjtök, zon 500 tót 700 maeter, haet hae in 'ne kano aafgelag. Hae kwaam die nach trök nao de boot naodet hae gewóndj waas geraak door aafgesjaote piele. Op 17 november waerde hae vermis en de vèsjers zoge de sjtamlede dem zie lief euver 't sjtrandj sleipe. De pelissie haet nog neet besjtaetig det Chau doed is, meh zaet waal det zie 'n plan aan 't opsjtèlle zeen wiedet zie 't sjtóffelik euversjot van 't eilandj eweg kónne kriege.
De Indische euverheid haet zeve vèsjers en anger luuj oet de ómgaeving aangehaje veur 't helpe van Chau mit op 't eilandj te kómme. De Sentineleze zelf kónne neet waere aangehaje en zölle ouch neet waere vervolg.
Mat Staver van de misjenaeregroep Covenant Journey brach e presberich oet woerin sjteit: "John heel van luuj en hae heel van Jezus. Hae waas bereid zie laeve te gaeve veur Jezus te deile mit de luuj van Naord-Sentineleilandj. Al saer de hoege sjoel wouw John nao 't Naord-Sentineleilandj gaon veur Jezus te deile mit de inbaorlinge."
Stephen Corry van Survival International, 'n rechtegroep in Londe veur inbaorlinge zaet: "De Sentineleze höbbe kier op kier getuind det zie mit rös wille waere gelaote en hunne wunsj mót waere gerespekteerd. De Britse koloniaal bezètting van de Andamaneilenj höbbe de sjtamme die dao laeve bekans oetgerot, woebie doezende van 't sjtamvouk ómkome en slechs e klein deil van de oersjprunkelike bevouking 't haet euverlaef. Daoveur is de angs van de Sentineleze veur oetgebaorene hiel versjtaonbaar." Wiejer sjprook hae zien zörg oet euver det Chau de Sentineleze mesjiens haet besjmet mit gekrenkdes woe zie geine waersjtandj taenge höbbe.
De Sentineleze verwilkómme bezeukers neet en de Indiase regering haet e sjtrik beleid van observatie zónger zich te bemuije mit de eilenjers. De Indische wèt verbèd det me binne 8 km van 't eilandj moog kómme. Nao 'ne zjwaoren orkaan in 2004 vuurde de sjtamlede piele aaf op 'ne marinehelikopter dae waas gesjik veur hun te bekieke nao d'n orkaan. In 2006 waerde nog twie vèsjers vermaord door de ingebaorene.
't Naord-Sentineleilandj is óngevier zoe groet wie Manhattan en haet 'n bevolking van tösje de 50 en de 150 minsje, mer 'n voukstèlling oet 2011 goof e väöl lieger aantal.
Brónne
[bewirk | brón bewèrke]- American 'killed in India by endangered Andamans tribe'. BBC, 11 november 2018
- Isolated tribespeople believed to have killed US missionary who trespassed on remote island. Sugam Pokharel & Euan McKirdy - CNN, 11 november 2018
Dit artikel besleit aad nuujs en maak deil oet van oos arsjief van nuujsberichte.