908 Limburgers positief getes, 90 gehiemeld

Van Wikinuujs

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich


Dit artikel sjteit gesjreve in 't AGL.

Opgetèld 117 Limburgers zien in 't aafgeloupe etmaal positief getes op corona. Daomèt kump 't totaal op 908. 't Aantal gehiemelde sjteeg mèt viefteen nao 90. Landelik gief 't noe 7.431 bevestigde coronakranke, det zien d'r 1.019 mier es aafgeloupe goonsdig. Nationaal sjteeg 't aantal doeje mèt 78 nao 434.

Det bliek oet 'nen dageliksen update van de Limburgse GGD's en 't RIVM.

Regionaal opgedeild geit 't in Zuud-Limburg noe óm 514 postief coronateste en 44 sjtörfgevalle. In Noord-Limburg zien 46 luuj aan corona euverleje en 349 luuj bevestig besjmet. Dao woort dónderdig euveriges beslote neet langer 't aantal sjtörfgevalle te publicere, ómdet 't neet ömmer dutelik is of emes door of mèt 't virus is gesjtorve. "Es det lèste 't geval is, is 't virus neet de doedsoerzaak gewees, mer 't lieje vanne patiënt", aldusse GGD. De GGD's en 't RIVM benaodrökke ouch det 't aantal besjmettinge neet langer representatief is veure óntwikkeling vanne epidemie, ómdet sjteeds minder luuj weure getes.

Duteliker is 't aantal patiënte det opgenome is (gewees) in 't krankehoes. Det sjteeg gister nationaal mèt 315 nao 2.151. Maondig goof 't nog 1.230, dinsdig 1.495 en goonsdig 1.836. 't Aantal ernstig kranke det oppe intensive care ligk, blief ouch oploupe. Dónderdig goof 't nationaal 682; 38 mier es goonsdig, zoe bliek oete gegaeves vanne sjtichting Nationale Intensive Care Evaluatie (NICE). Limburgse gegaeves euvere IC-bezetting zien noneet aopebaar besjikbaar.

't RIVM versjteit dees gegeves es 'n veurzichtige sjtabilisatie vanne corona-epidemie. "'t Aantal in 't krankehoes opgenome patiënte en 't aantal gehiemelde nump minder hel toe es se zónger sociaal maotregele zouws verwachte Dit zouw t'rop kènne wieze det de genome maotregele invlood kriege oppe sjnelheid woemèt 't virus zich versjpreidt".

Christian Hoebe, huid infectiekrenkdebesjtreiding bie de GGD in Zuud-Limburg, vindj 't nog te vreug óm te concludere det sjprake is van sjtabilisatie. "Dao zien de getalle en de versjille, zikker in Limburg, te klein veur. 't Is nog get te flot. Ich zeen nog väöl ónzikkerhede en zouw dees situatie gaer nog e paar daag wille aafwachte. 't Is hielemal waor det de aantalle minder hel sjtiege, mer 't kèn d'rtoe leije det luuj, dewiel de meiste zich noe baeter ane opgelagde maotregele haje, 't geveul kriege det det allemal neet mier hoof. Det is 't lèste wat v'r mótte wille".


Brónne[bewirk | brón bewèrke]




Dit artikel besleit aad nuujs en maak deil oet van oos arsjief van nuujsberichte.