12 jaor en zès maonde gevangenissjtraof veur Jos B., gein tbs

Veug links toe
Van Wikinuujs

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich

Dit artikel sjteit gesjreve in 't AGL.

Jos B. (58) weurt tot 12 jaor gevangenissjtraof veroerdeild veur 't misbroeke en al of neet expres verwörge van Nicky Verstappen, plus zès maondj veur 't bezit van kènjerporno. Det haet de rechbank in Mesjtreech vriedigmiddig besjlaote. De rechbank lag gein tbs op. B. zaet direk in hoeger beroop te gaon.

De Zumpelvelder woort verdach van 't óntveure, misbroeke en doed make van Nicky Verstappen (11) in 1998. De femielieleje van Nicky, die bie eder zitting aanwaezig waore, huurde 't vonnis in traone aan.

Eis
Justitie eisde veurige maondj nog 15 jaor en tbs taege de verdachte en es gein tbs zouw weur toegekèndj 'n celsjtraof van 18 jaor. De rechbank geit dao neet in mit. B. woort waal veroerdeild veur 't misbroeke en óntveure van Nicky, mer neet veur doedsjlaag. De rechbank geit d'r waal vanoet det B. Nicky haet doed gemaak. Ouch weurt B. sjöldig bevónje aan 't bezit van kènjerporno. Normaal weurt daobie oetgegange van 12 maonde gevangenissjtraof, aevel B. krieg daoveur zès maonde cel.

DNA-match
De naobesjtaonde van Nicky höbbe ruum 22 jaor mótte wachte op dees oetsjpraok. De jóng oet De Heibloom verdween tiedes e zomerkamp oppe Broensemerhei en woort d'n angeren daag doed truukgevónge in e sjparreböske. Pas nao bauw twintig jaor woort 'nen DNA-match gevónje mit B., dae oetintelik woort aangehaje in Sjpanje.

Gein antjwaord
Óndanks de veroerdeiling höbbe de naobesjtaonde nog ömmer gein antjwaord oppe vraog wat percies mit Nicky is gebeurd. De offesere van 't Aopebaar Ministerie gove toe det 't häör neet waor gelök 'n antjwaord te kriege op die vraog. Deskóndige kóste gein doedsoerzaak aantuuene en ouch 't bewies veur misbroek waor neet euvertugend genóg. Justitie baseerde de zaak veural op 't DNA van B. det is gevónje gewaore oppe óngerbóks van Nicky.

Videoverklaoring
B. bewaerde oppen ierste zittingsdaag in 'n videoverklaoring det hae Nicky doe doed zouw höbbe gevónje in 't sjparreböske en det hae de kleijaasj vanne jóng haet gefatsoeneerd. Hae mèlde zien vónds aevel neet ómdet hae bang waor det nemes 'm zouw geluive vanwaege zeen zedeverleije. Zien verhaol zouw de aanwaezigheid van zeen DNA kènne verklaore, zag avvekaat Gerald Roethof.

Brónne[bewirk | brón bewèrke]


Dit artikel besleit aad nuujs en maak deil oet van oos arsjief van nuujsberichte.

Aafkómstig van "https://li.wikinews.org/w/index.php?title=12_jaor_en_zès_maonde_gevangenissjtraof_veur_Jos_B.,_gein_tbs&oldid=17074"