Google kundig plan aan Google Plus oet te sjalte veur individueel gebroek en te laote veur bedriever

Van Wikinuujs

Veurblaad - Lètste verangeringe, Willekäörige pazjena, Veur pagina's in, Alle artikele - De Kaffee, Zandjbak, Hölp, Spellingshölp - Nuujseuverzich



Dit artikel sjteit gesjreve in 't AGL
logo van Google+

11 oktoeber 2018 - D'n technologiegigant Google oet de Vereinigde Sjtaote kundigde d'n aafgeloupe maondig aan op hunnen officiele blog det zie 't sociaal nètwerk Google+ op internet gaon aafsjloete veur individueel gebroek. Ze zagte det in dees aankundiging naodet zie veur versjèllende maonde lang höbbe wie geanalyseerd wiedet Google+ weurt gebroek. Hiejbiej bleek det 't 'n lieger graod van "gebroek en betrókkenheid" had, terwiel veur 't platform online te haje väöl köste gemeujd zeen veur 't behaud van de veiligheid. 't Platform zouw besjikbaar blieve veur 't gebroek door bedriever.

Volges de analuse gebroeke luuj Google+ veur minder es vief sekonde per bezeuk in 90 procent van de gevalle. De sjloeting van Google+ zouw allein van toepassing zeen veur individue die teen maonde kriege veur d'n euvergank en waere veurzeen van infermasie euver wiedet zie hun gegaeves van de deens kónne ophaole.

Ben Smith, 'nen óngerveurzitter van techniek bie Google, sjreef in e blogbesjeid: "T'n aanzeen van dees oetdaginge en 't hiel lieg gebroek van de consumenteversie van Google+, höbbe veer besjlaote de consumenteversie van Google+ oet de lóch te haole." Wiejer vertèlde hae det Google de veiligheid geit aansjerpe van de apps die vraoge veur toegank nao gebroekersinfermasie, woebiej de gebroekers de meugelikheid kriege zelf aan te vinke wat precies weurt gedeild.

In de aankundiging verwies Google ouch nao de kwetsjbaarheid van de website van Google+, woe me in miert achterkwaam. Hiejbiej zouwe de privaatgegaeves van zon 500.000 gebroekers te vinje zeen gewaes. Dit oetlaeke van gegaeves waas sjienlik minimaal en bepèrk tot name, e-mailadresse, beroop, gesjlech en laeftied van de gebroeker. Anger gegaeves wie tillefoonnómmers, privaatberichte, aopenbaar berichte en gegaeves van anger konto's op Google bleve hiejbiej veilig. Google haet dit probleem opgelos, mer had toe neet te kènne gegaeve det dit laek zich had veurgedaon. Dit lieverde Google väöl kritiek op. Volges 't officieel blogbesjeid van Google waas dit incidènt 'nen indikator van d'n inzèt van 't óngerhaud van de software en de juridische risico's van 't door laote gaon van 't platform.

In de aankundiging zag Google det 't in de toekóms zich geit richte op deenste veur bedriever en organisaties.


Brónne[bewirk | brón bewèrke]



Dit artikel besleit aad nuujs en maak deil oet van oos arsjief van nuujsberichte.